Къэмыхъуным улъыплъэныр нахьышIу

Мэзхэр машIом щыухъумэгъэнхэм ылъэныкъокIэ блэкIыгъэ илъэсым зэшIохыгъэ хъугъэхэм, мыгъэ анахьэу анаIэ зытырагъэтын фаехэм афэгъэхьыгъагъ Мыекъопэ мэз хъызмэтшIапIэм щыкIогъэ Iофтхьабзэр.

Къыблэ ыкIи Темыр Кавказ федеральнэ шъолъырхэм ямэз­хэр машIом щыухъумэгъэнхэм фэгъэзэгъэ Штабэу зэхащагъэр ары ащ кIэщакIо фэхъугъэр. Къыблэ федеральнэ шъолъырым мэз хъызмэтымкIэ и Департамент ыкIи мы Штабым япащэу Петр Костенич, АР-м и Премьер-министрэ игуадзэу Сапый Вячеслав, АР-м мэзхэмкIэ и ГъэIорышIапIэ ипащэу Былымыхьэ Рэщыдэ, нэмыкIхэр ащ хэлэжьагъэх.

Петр Костенич Къыблэ ыкIи Темыр Кавказ шъолъырхэм ямэзхэр машIом щыухъумэ­гъэнхэм ылъэныкъокIэ 2019-рэ илъэсым Iофэу ашIагъэр къызэфихьысыжьзэ, зэкIэ зэхэу­бытагъэу пштэмэ, уигъэрэзэнэу зэрэщымытыр къыхигъэ­щыгъ. Гъэтхэ-гъэмэфэ уахътэу машIом зыкъыштэным ищынагъо нахьыбэ зыщыхъурэм субъектхэм ащыщхэм ащ изыфэ­гъэхьазырын Iэпэдэлэл зэрашIыгъэр ушъхьагъу фэхъугъэу ары къызэриIуагъэр. Iофыр нахь зыщыдэигъэхэр къыхигъэщыгъэх, хэукъоныгъэу ашIыгъэхэми къатегущыIагъ.

Мэзхэр машIом щыухъумэ­гъэнхэм икъоу зыфэзгъэхьазырыгъэу ыкIи ащ зыкъызештэм игъом пэшIуекIошъугъэхэм ащыщэу Адыгеим ыцIэ къыри­Iуагъ, зэкIэ ащ хэлэжьагъэхэм зэрафэразэм къыкIигъэтхъыгъ.

Гъогогъу 11-рэ блэкIыгъэ илъэсым республикэм имэзхэм машIо къащыхъугъ, гектар 33-м ехъу зэлъикIугъагъэр. Гъозэ­рыплъэ мэз хъызмэтшIапIэр
ары анахьыбэу, гъогогъуи 7-рэ, зыкъызщиштагъэр. Ау сыди­гъокIи чIыпIэшхо зэлъиштэнэу игъо имыфэзэ агъэкIосэжьы­шъугъ. Ар пстэумэ апэу мэз­пэсхэм яшIушIагъэу Департаментым ипащэ ылъытагъ.

Джащ фэдэу Адыгеим имэз­хэм ащыщ Iахь бэджэндэу зыштэхэрэми машIор къэмы­хъуным фытегъэпсыхьэгъэ Iоф­тхьабзэхэр хэзыгъэ имыIэу зэрагъэцакIэхэрэр, ащкIи нэ­мыкI субъектхэм апэ ренэу зэришъыхэрэр, машIом мэзхэр щыухъумэгъэнхэм пае зэшIуа­хыщтхэм яплани апэу респуб­ликэм и ГъэIорышIапIэ сыди­гъокIи къызэригъэхьазырырэр ащ къыхигъэщыгъ.

— 2020-рэ илъэсэу къихьагъэми ащ тетэу шъуипшъэрылъхэр жъугъэцэкIэнхэу тыщэгугъы, — къыIуагъ Петр Костенич. – ПэшIорыгъэшъэу зэрагъэунэ­фыгъэмкIэ, мыгъэ гъатхэр фэ­бэщт. Ар къыдэлъытагъэу, ма­шIом зыкъыштэным ищынагъо нахьыбэ зыщыхъурэ уахътэр мэлылъфэгъум и 1-м къежьэщт. Арышъ, профилактикэ Iофым нахьыбэу шъунаIэ тежъугъэт, машIоу зыкъэзыштагъэм уебэныным нахьи къэмыхъуным упылъымэ нахьышIу. БлэкIыгъэ илъэсым щыкIагъэу къыгъэнэфагъэ щыIэмэ, мыгъэ дэгъэзы­жьыгъэ хъун фае.

Петр Костенич къызэриIуагъэмкIэ, Къыблэ ыкIи Темыр Кавказ шъолъырхэм ямэзхэм машIо къащымыхъуным субъект­хэм зызэрэфагъэхьазырыгъэр мэзаем и 24-м къыщыублагъэу гъэтхапэм и 12-м нэс ауплъэ­кIущт.

Сапый Вячеслав нэужым гу­щыIэр зештэм, Адыгеир шIукIэ къызэрэхагъэщыгъэр лъэшэу зэрягуапэр къыIуагъ, ау ащ пае яIофшIэн къыщагъакIэ зэрэмыхъущтыр, ары пакIошъ, зыпарэкIи машIо тимэзхэм къащымыхъуным нахь гъэлъэшыгъэу фэбэнэнхэу ащ пшъэрылъ къызэригъэуцурэр къыхигъэ­щыгъ.
Нэужым мэзхэр машIом щыухъумэгъэнхэм ылъэныкъокIэ анахьэу анаIэ зытырагъэтын фаехэм, хэукъоныгъэу нахьыбэрэ хашIыхьэхэрэм, ахэр дэгъэзыжьыгъэ зэрэхъущтым афэ­гъэхьыгъэу къэгущыIагъ Къыблэ федеральнэ шъолъырым мэз хъызмэтымкIэ и ­Департамент ипащэ игуадзэу Юрий Морозовыр.

Пстэумэ ауж 2019-рэ илъэсым Iофэу ашIагъэм ащ фэдэу осэ ин къызэрэфашIыгъэм пае «тхьашъуегъэпсэу» къариIуагъ АР-м мэзхэмкIэ и ГъэIорышIапIэ ипащэу Былымыхьэ Рэщыдэ. Нахьыбэу мэзхэм машIо къащымыхъуным лъыплъэрэ къулыкъум ишIушIагъэу ар зэрэщытыр къыхигъэщыгъ. Лъэпкъ проектым ишIуагъэкIэ мэзхэр машIом щыухъумэгъэнхэм пае ящыкIэгъэ техникэр зэкIэ яIэ зэрэхъугъэри къыIуагъ, тапэкIи яIофшIэн къызэрэщамыгъэкIэщтым къыкIигъэтхъыгъ.

ХЪУТ Нэфсэт.