Лъэтегъэуцо фашIыгъ

Мыекъуапэ икъэхъукIэрэ тарихъ гъогоу къыкIугъэмрэ зышIомыгъэшIэгъон цIыф Адыгеим исын фаеп. Ар республикэм икъэлэ шъхьаI, анахь къэлэ кIэракIэу Урысыем и Къыблэ шъолъыр итхэм ащыщ, илъэс псаум щыфаб, щышхъуантI ыкIи щыгупсэф.

Мыекъопэ къэлэ администрацием «Мыекъуапэ» («Долина Мые») зыфиIоу ыгъэхьазырыгъэ маршрутхэм ягъэцэкIэн ра­гъэ­жьагъ. Экскурсиехэр культурнэ ыкIи гъэсэныгъэ мэхьанэ зиIэхэ маршрутхэм ащыкIощ­тыгъ.

БэмышIэу экскурсионнэ маршрутыкIэ къалэм къыщызэIуахыгъ. Ар тидзэхэм ТекIоныгъэр Хэгъэгу зэошхом къызыщыдахыгъэр илъэс 75-рэ зэрэхъурэм фэгъэхьыгъэщт, зэреджагъэхэр «ТекIоныгъэм екIурэ гъогур». Экскурсием изэхэщакIохэм а маршрутым лъэтегъэуцо фа­шIыгъ, ащ къэлэ еджапIэхэм ныбжьыкIэхэу ачIэсхэр къырагъэблэгъагъэх.

Заом илъэхъан Мыекъуапэ къыщыхъугъэхэ хъугъэ-шIагъэ­хэр, ахэр зыщыкIогъэхэ чIыпIэхэр экскурсиякIэм къекIуа­лIэхэрэм арагъэлъэгъущтых ыкIи къафаIотэщтых. МаршрутыкIэм рыкIо зышIоигъо пстэури шIэхэу ащ къырагъэблагъэхэу зэрэрагъэжьэщтыр къэлэ админис­трацием ипресс-къулыкъу къы­Iуагъ.

Экскурсиер къэлэ паркым къыщырагъэжьэщт, урамэу Лениным ыцIэ зыхьырэм рыкIощтых, Советскэ Союзым и ЛIыхъужъэу Дмитрий Зюзиным исаугъэт зыдэщыт чIыпIэм щаухыщт.

Къалэу Мыекъуапэ щызэхащэщтхэ экскурсиехэр археологием, архитектурэм, зэо лъэ­хъаным ыкIи культурэм афэ­гъэхьыгъэщтых.

Апэрэ экскурсиеу икIыгъэ гъэмафэм цIыфхэр зыхэлэжьагъэхэр къэлэ паркым икIэу Шъхьэгуащэ исэмэгу нэпкъ щыIэ зыгъэпсэфыпIэу «Мэздах» зыфиIорэм екIуалIэрэр ары. ЗыплъыхьакIохэм къэлэ паркыр загъэпсыгъэр, зыфэдагъэр, зэхъокIыныгъэу фэхъугъэхэр къафаIотагъ, псыхъо кIыбым археологическэ саугъэтхэр бэу зэрэщыIэхэр, ахэм ятеплъэхэр къарагъэлъэгъугъэх.

«ТекIоныгъэм екIурэ гъогум» шIэхэу ныбжьыкIэхэм ямыза­къоу, зыныбжь икъугъэхэри къырагъэблагъэхэу рагъэжьэщт.

Шъаукъо Аслъангуащ.