«Зэкъошныгъэм» зегъэхьазыры

Мыекъопэ футбол клубэу «Зэкъошныгъэм» 2019 – 2020-рэ илъэс ешIэгъум пидзэжьынэу зегъэхьазыры.

— «Зэкъошныгъэм» изыгъэпсэфыгъо мафэхэр ыухыгъэх, — къы­тиIуагъ тренер шъхьаIэу, Адыгэ Республикэм изаслуженнэ тренерэу Ешыгоо Сэфэрбый. — Илъэс ешIэгъур гъэтхэпэ мазэм и 14-м тыублэжьыщт.

— Сэфэрбый, гъэзетеджэхэр нахьыбэрэ къызыкIэупчIэхэрэр командэм хэкIыжьыгъэхэмрэ кIэу шъуштагъэхэмрэ.

— Денис Замятиныр, Альберт Арзуманян, Гудиса Смыр, Кирьян Артем «Зэкъошныгъэм» хэкIы­жьыгъэх.

— КIэу шъуштагъэхэм тащыгъэгъуазэба.

— Адыгэ Республикэм щапIугъэхэ кIалэхэр «Зэкъошныгъэм» къедгъэблэгъагъэх. Республикэм футболымкIэ испорт еджапIэхэм ащагъасэхэрэр арых тинэплъэгъу итыхэр. ЧIыпIэ футболым изыкъегъэIэтыжьын хэушъхьафыкIыгъэу Iоф дэтшIэщт.

— Хэта мыгъэ «Зэкъошныгъэм» щытлъэгъущтыр?

— ЕшIэкIо ныбжьыкIэхэр 10-м нахьыбэ мэхъух. Мы мафэхэм ахэр ныбджэгъу ешIэгъухэм ахэ­лэжьэщтых. «Зэкъошныгъэм» шIуагъэ къыфэзыхьын зылъэкIыщтхэу тлъытэхэрэр къахэтхыщтых, ацIэхэр нэужым къетIощтых.

— Футбол ешIапIэу, стадионэу тиIэр нахьыбэ мэхъу. Неущрэ мафэм телъытагъэу шъуиIофшIэн лъыжъугъэкIотэным шъуфэхьазыра?

— КIэлэцIыкIу спорт еджапIэхэр тиIэх. Спорт классхэр зэхэщэгъэнхэм, нэмыкIхэм тапылъ. Адыгэ Республикэм игимназие тыщыIагъ, еджапIэм ипащэхэм къыддырагъэштагъ, ау щыIэныгъэм диштэу лъыдгъэкIо­тэным фэшI хэбзэ шапхъэхэр къыдэлъытэгъэнхэ фае.

— Илъэс ешIэгъур ежъугъэ­жьэным ыпэкIэ ныбджэгъу зэIукIэгъухэр шъуиIэщтха?

— Оренбург икомандэ тыде­шIагъ. Зыгъэпсэфыгъо мафэм Тамбов икомандэ Крымскэ ты­щыIу­кIэщт. Мэзаем и 19-м Адлер тыкIощт. ЗэIукIэгъухэм зафэтэгъэ­хьазыры.

— «Зэкъошныгъэм» игъэхъа­гъэхэм ахигъэхъонэу, нахьыбэрэ тыжъугъэгушIонэу шъуфэтэIо.

— Тхьауегъэпсэу.

Сурэтым итыр: Ешыгоо Сэфэрбый.

 

ЕМТIылъ Нурбый.