АмалыкIэхэм алъэхъух

Къытезыдзэхэрэ узыр (эпилепсиер) къызэузэу щыIэр макIэп. Ар шъхьэкуцI узхэм ахалъытэ, уз хьылъэхэм ащыщ, гъэхъужьыгъуае.

Къэралыгъо статистикэм къызэригъэлъагъорэмкIэ, нэбгырэ мини 100-м щыщэу нэбгыри 10 илъэс къэс эпилепсиер къызфэ­хъыерэр. Игъом узым зыщыпэуцужьыщтхэ IэзапIэхэр щыIэхэ зыхъукIэ, шъхьэ­куцI узым ыгъэгу­мэкIыхэрэм япчъагъи къыщыкIэщт.

Ащ фэдэ узым цIыфыр зэ нахьэу къытыримыдзэу, охътэ гъэнэфагъэкIэ къыфежьэу, къы­мыгъэгумэкIыхэуи мэхъу. Арэущтэу щытми, нервэ узэу эпилепсиер зиIэхэм агъашIэрэр адрэ пстэумэ зэранахь макIэр эпилептологхэм къаIо.

Эпилепсием зыщеIэзэхэрэ нейрохирургие гупчэу къэралыгъом итхэр икъурэп. УФ-м псауныгъэр къэухъумэгъэнымкIэ и Министерствэ ахэр къэлэ шъхьаIэхэм зэращыIэхэр, шъо­лъыр зэфэшъхьафхэм ащыпсэухэрэм ахэм къащяIэзэнхэу амал зэрямыIэр къеIо.

IэкIыб хэгъэгухэр эпилепсием игъэхъужьынкIэ тапэ ишъы­гъэх, узыр жьэу къыхагъэщыгъэмэ, агъэрэхьатын алъэкIы, сымаджэм къинэу телъыр къы­фагъэпсынкIэ, агъэхъужьы.

Урысыем ичIыпIэ зэфэшъхьафхэм къытезыдзэхэрэ узым зэрэпэуцужьыщтхэ амалыкIэхэм ащылъэхъух, къадэхъугъэри макIэп.

Эпилепсием ыгъэгумэкIырэ сымаджэхэм медицинэ гупчэхэм ямызакъоу, субъект зэфэшъхьафхэми джы ащяIазэхэу рагъэжьэщт. Специалистхэм къызэраIорэмкIэ, Iэзэгъу уцхэм зишIуагъэ къямыкIырэ сыма­джэхэм хэкIыпIэу яIэр зы – операцие ашIынхэр ары.

Илъэс къэс нэбгырэ 1500-рэ фэдиз врачхэм операцие ашIын фаер, ау ар къыздэхъурэр нэбгырэ 400-м ехъурэп. Непэ ахэр зыщашIыщтхэ гупчэхэри, зышIыщтхэ врачхэри икъухэрэп. А пстэумэ къапкъырыкIыхэзэ Урысые Федерацием псауны­гъэр къэухъумэгъэнымкIэ и Министерствэ иунашъокIэ нейрохирургие гупчэхэу эпилепсием зыщяIэзэщтхэр зыщызэхащэщт шъолъырхэр къыхахынхэу рагъэжьагъ. Мы лъэхъаным проектэу «Организация системы хирургической помощи пациентам с фармакорезистентными формами эпилепсии в РФ» зыфиIорэм специалистхэм яшъып­къэу Iоф дашIэ.

БэмышIэу Урысые Федерацием псауныгъэр къэухъумэгъэ­нымкIэ и Министерствэ инейрохирург шъхьаIэу, шIэныгъэ­хэмкIэ Урысые Академием иакадемикэу, профессор цIэры­Iоу Владимир Крыловыр Кавказым щыIагъ. Къэбэртэе-Бэлъ­къар Республикэм эпилепсием зыщеIэзэщтхэ медицинэ Гупчэ щызэхащэнэу тыраубытагъ. Нейрохирургие отделениеу республикэм исымэджэщ шъхьаIэ хэтыр ащ тегъэпсыхьагъэу профессорым ылъытагъ. Сымаджэхэм специалистхэм къыхахыгъэ амалыкIэхэр агъэфедэщтых, операциехэр ашIыщтых. Наукэр зы чIыпIэ итырэп. Ме­дицинэмкIи сымаджэхэмкIи ащ мэхьанэшхо иI.

Академикэу В. Крыловымрэ КъБР-м псауныгъэр къэухъумэгъэнымкIэ и Министерствэрэ шъхьэкуцI узым Налщык щеIа­зэхэу зэрэрагъэжьэщтымкIэ зэзэгъыныгъэ зэдашIыгъ. Проек­тыр зэрагъэцакIэрэм ежь ышъхьэкIэ ынаIэ тетыщт, къакIозэ ышIыщт. Сымэджэщым испециалистхэм яшIэныгъэхэм ахагъэ­хъощт, операциехэр зэрашIыщтхэ шIыкIэхэм афагъэсэщтых.

Къэбэртэе-Бэлъкъар Респуб­ликэм къыщызэIуахыщт Гупчэм Урысые Федерацием икъыблэ лъэныкъо исубъектхэм ащыпсэухэрэ цIыфхэр къекIолIэнхэу фитыныгъэ яIэщт. Къытезыдзэ­хэрэ узым ыгъэгумэкIыхэрэм мыщ IэпыIэгъу щарагъэгъотыщт.

– Шъолъырхэм IэпыIэгъур къызэранэсыгъэр игъо шъып­къэу щыт, – къыIуагъ В. Крыловым. – Сымаджэ хъугъэ пстэумэ IэзэпIэ гупчэ инхэм ащыщ кIонышъ, къызэригъэIэзэнхэу амал зиIэу ахэтыр макIэ. Нейрохирургие гупчэхэу Урысыем ичIыпIэ зэфэшъхьафхэм къащызэIутхыщтхэм яшIуагъэ сымаджэхэм зэрякIыщтым сицыхьэ телъ.

Къэралыгъо статистикэм къы­зэригъэлъагъорэмкIэ, нэбгырэ мини 100-м щыщэу нэбгыри 10 илъэс къэс эпилепсиер къыз­фэхъыерэр. Игъом узым зыщыпэуцужьыщтхэ IэзапIэхэр щыIэхэ зыхъукIэ, шъхьэкуцI узым ыгъэ­гумэкIыхэрэм япчъа­гъи къыщыкIэщт.

Шъаукъо Аслъангуащ.