Газыр къанэсыгъ

Къуаджэу Агуй-Шапсыгъэ дэт еджапIэу N 15-у Н. Тхьагъушъэм ыцIэ зыхьырэр загъэпсыгъэр тыгъэгъэзэ мазэм илъэс 90-рэ хъугъэ. ТIопсэ районым ипащэу Виталий Мазниковымрэ Адыгэ Хасэм и Совет хэтхэмрэ ащ Iоф щызышIэрэ кIэлэегъаджэхэмрэ еджакIохэмрэ ямэфэкIкIэ афэгушIуагъэх.

В. Мазниковым ипсалъэ къыщыхи­гъэщыгъ Агуй-Шапсыгъэ иеджапIэ итарихъ зэрэбаир ыкIи зэрэгъэшIэгъоныр. ЕджапIэр къуаджэм зэригупчэм имызакъоу, ащ дэс цIыф пэпчъ ыцIэ еп­хыгъ. Мы лъэхъаным ащ щырагъэджэрэ сабыйхэм ящыкIагъэр зэкIэ агъоты. Яклассхэр хъоо-пщаух, спортзалыр дэгъу, кабинетхэр зэтегъэпсыхьагъэх. ЕджапIэр уахътэм диштэу агъэпсыным фэшI районым ибюджет щыщэу сомэ миллионитIу къыфатIупщыгъагъ, ахъщэр лъэшэу къашъ­хьэпагъ.

Районым ипащэхэм къоджэдэсхэр бэрэ зэжагъэхэ шIухьафтын къафа­шIыгъ — газыр псэупIэм къыдащагъ, етIупщыгъэу ар зэбгыращы.

Адыгэ Хасэм итхьаматэ ТIопсэ районымкIэ игуадзэу Шъхьэлэхъо Сэфэр къеIуатэ:

— ИлъэсыкIэр къэмысызэ гъэстыныпхъэ шхъуантIэр культурэм и Унэу къуа­джэм дэтым етщэлIагъ. ТапэкIэ еджапIэм, кIэлэцIыкIу IыгъыпIэм, ФАП-м ар анэдгъэсыщт.

Муниципалитетым иадминистрацие къызэриIуагъэмкIэ, Агуй-Шапсыгъэ газыр къырыдащэнэу Краснодар краим ахъщэ IэпыIэгъу къафитIупщыгъ. IофшIэнхэр къызаухыкIэ, къоджэдэсхэм япроцент 90-рэ фэдизым яунэхэм гъэстыныпхъэ шхъуантIэр аращэлIэн алъэкIыщт.
Ныбэ Анзор.