Медальхэм афэбэнэщт

Хэгъэгум баскетболымкIэ изэнэкъокъоу суперлигэм иятIонэрэ куп щыкIорэм «Динамо-МГТУ-р» щешIэ.

Щылэ мазэм и 31-м ыкIи мэзаем и 1-м «Динамо-МГТУ-р» Ростов-на-Дону икомандэ «Ошъутенэм» щыIу­кIэщт.

— Мэзаем и 1-м пэшIорыгъэшъ ешIэгъухэр суперлигэм щытыухыщтых. ЯтIонэрэр чIыпIэр зэнэкъокъум къыщыдэтхыгъ. Медальхэм тафэбэнэнэу мэзаем и 8-м едгъэжьэщт, — къы­тиIуагъ «Динамо-МГТУ-м» итренер шъхьаIэу, Адыгеим изаслуженнэ тренерэу Андрей Синельниковым.
Мэзаем и 8 – 9-м «Динамо-МГТУ-р» Тамбов икомандэ Мые­къуапэ щыIукIэщт.