Унагъор къафэраз

Адыгэ Республикэм хэгъэгу кIоцI IофхэмкIэ ими­нистрэу Владимир Алай 2020-рэ илъэсымкIэ апэ­рэ рэзэныгъэ тхыгъэ къыIэкIэхьагъ.

Самарэ хэкум щыпсэурэ Ва­силий Холявкэ гъогурыкIоныр щы­нэгъончъэнымкIэ Къэралыгъо автоинспекцием и ГъэIорышIапIэу Адыгеим щыIэм икъулыкъушIэхэм зэрафэразэр зэрыт тхыгъэ хэгъэгу кIоцI IофхэмкIэ Министерствэм ипащэ къыфигъэхьыгъ.

Гъонэжьыкъо Рустамрэ Бэгъушъэ Аслъанрэ кIэлэцIыкIум ищы­Iэныгъэ къагъэнэжьыгъ.

КъызэрэнэфагъэмкIэ, мы хъу­лъфыгъэм иунагъо къалэу Краснодар кIощтыгъ, ягъогу Адыгеим пхырыкIыщтыгъ. Машинэм зэ­шъхьэгъусэхэр ыкIи мэзитIу зыныбжь ясабый цIыкIу исыгъэх.

Автомобиль гъогоу «Краснодар — Верхнебаканский» зыфиIорэм тетхэу къачъэхэзэ сабыир дэи къэ­хъугъ, ерагъэу жьы къыщэщтыгъ. Iофым изытет тым къыгурыIуагъ ыкIи гъогум тетыгъэ полицейскэхэм зафигъэзагъ.

А уахътэм къулыкъу зыхьы­щтыгъэхэ полицием икапитанэу Гъонэжьыкъо Рустамрэ полицием истаршэ лейтенантэу Бэгъушъэ Аслъанрэ гузэжъогъу чIыпIэ ифагъэхэ зэшъхьэгъусэхэмрэ сабыимрэ патруль машинэм псынкIэу рагъэтIысхьагъэх. Сигнализациер хагъани, Краснодар дэт медицинэ учреждениехэм ащыщым унагъор ращэлIагъ, ащ игъом сабый цIыкIум IэпыIэгъу къыщыфэхъугъэх.

Пчыхьэм полицейскэхэр тым телефонымкIэ фытеуагъэх, сабыим кIэупчIагъэх. Василий къызэриIуагъэмкIэ, кIэлэцIыкIум ипсауныгъэ зыпкъ иуцожьыгъ, зи щынагъо щыIэжьэп.

ГукIэгъуныгъэ, цIыфыгъэ къыз­хэфагъэхэ къулыкъушIэхэм нымрэ тымрэ афэразэх. Игъом унагъом IэпыIэгъу зэрэфэхъугъэхэм ишIуагъэкIэ сабый цIыкIум ищыIэныгъэ къагъэнэжьыгъ.

Адыгеим хэгъэгу кIоцI
IофхэмкIэ и Министерствэ ипресс-къулыкъу