ГумэкIыгъохэр дагъэзыжьых

Щылэ мазэм и 22 — 23-рэ чэщым Адыгеим ишъолъыр ом изы­тет зэхъокIынэу синоптикхэм пэшIорыгъэшъэу къатыгъагъ. Ары зэрэ­хъугъэри — жьыбгъэшхоу къилъыгъэм ыкIуачIэ зы нэгъэупIэпIэгъум метрэ 20-м нэсыщтыгъ, ощхыр къыкIэлъыкIуагъ ыкIи ащ къыхэсэжьыгъ.

Мэфэку чэщыр къызыщи­хьагъэм зэрэжьыбгъэшхуагъэм къыхэкIэу электроэнергием икъэтын зэпыугъохэр зыщыфэ­хъугъэ, чъыгхэр зыщырикIы­кIыгъэ чIыпIэхэр къыхэкIыгъэх. Ахэр: Мыекъуапэ игупчэ, Черемушкэр ыкIи Мыекъопэ районым ипсэупIэхэм ащыщхэр.

«Россети Кубань» зыфиIорэм и Адыгэ къутамэ къызэритыгъэм­кIэ, яспециалистхэм гъэлъэшыгъэ шIыкIэм тетэу Iоф ашIэ.

Мобильнэ IофышIэхэр, хэу­шъхьафыкIыгъэ техникэр, энергиер къэзытырэ IэпэчIэгъэнэ къэкIуапIэхэр икъу фэдизэу хьазырых. Зэпымыоу ом изытет лъэплъэх. Технологическэ укъо­ныгъэхэр зыщыхъухэрэ чIыпIэ­хэм энергетикхэм ябригадэхэр кIонхэм фэхьазырых. Къэлэ кIоцIым бригади 6-мэ Iоф щашIэ. Социальнэ мэхьанэ зиIэ объект­хэм зэпыугъо фэмыхъоу электроэнергиер аIэкIэгъэхьэгъэным анахьэу анаIэ тырагъэты.

Гидрометеорологическэ къулыкъухэм, ошIэ-дэмышIэ IофхэмкIэ Министерствэм, къэлэ администрацием зэпхыныгъэ зэдыряIэу Iофым лъэплъэх.

Энергетикхэм шъунаIэ тырышъуагъадзэ: энергообъектхэм апэгъунэгъоу шъумыуцу, метри 8 нахь благъэу зэпычыгъэ линие­хэм шъуакIэрымыхь, шъор-шъо­рэу гъэцэкIэжьын Iофхэр линиехэм яшъумышIылI.

Техническэ укъоныгъэхэр къэ­хъухэмэ, гумэкIыгъо шъуха­фэмэ «Россети Кубань» зыфи­Iорэм зыфэжъугъаз, ащ «илиние плъырэу» 8-800-100-15-52-м шъутеу.

Мыекъопэ къэлэ администрацием ипресс-къулыкъу къызэритыгъэмкIэ, хэушъхьафыкIыгъэ техникэ 19-у осыр зытхъухэрэр щылэ мазэм и 23-м пчэдыжьым къалэм иурамхэм къатехьагъэх. Общественнэ транспортыр зэ­рыкIорэ гъогухэм анаIэ нахь атырагъэты.

Ом изытет къызэрэучъыIы­гъэм имызакъоу, урамхэм осыр къызэратырилъхьагъэм къы­хэ­кIэу Адыгеим и Къэралыгъо автоинспекцие гъогум нахь щы­сакъынхэу водительхэм зафе­гъазэ.

Нахь пасэу шIункI къызэрэ­хъурэм дакIоу республикэм чIыпIэ-чIыпIэу гъогухэр Iумыл щэхъух.

Зыщышъумыгъэгъупш гъогур Iумыл зыхъукIэ хъугъэ-шIагъэ ухэфэным ищынагъо къызэрэуцурэр.

Общественнэ транспортыр къызыщыуцурэ чIыпIэхэм, гъогу зэхэкIыпIэхэу машинабэ зыщызэблэкIыхэрэм ыкIи нэфры­гъуа­зэхэм апашъхьэ анахьэу са­къыныгъэ къызщыхэжъугъаф!

Водительхэм ямызакъоу, лъэс­рыкIохэри мы лъэхъаным нахь зыфэсакъыжьынхэ фае. Маши­нэхэр зэрыкIохэрэ гъогур зэ­пышъучы зыхъукIэ бгъу пстэумкIи зышъуплъыхь. Шъуищы­гъынхэм къэнэфырэ пкъыгъохэр ахэ­шъулъхьаныр зыщышъумы­гъэгъупш.

Синоптикхэм къызэратырэмкIэ, щылэ мазэм и 24 — 25-м ощх-осхэр зэпыужьынхэу ары. Ау ащ емылъытыгъэу, ом изытет чэщым градуси 5 — 10-м нэсэу къэучъыIыщт, мафэм градусыр — 0-м фэдизыщт.

Iэшъынэ Сусан.