АфимыкIыкIыгъэ Ленинград

Урысые Федерацием и Президент иунашъоу N 327-у бэдзэогъум и 8-м, 2019-рэ илъэсым къыдэкIыгъэм 2020-рэ илъэсыр УрысыемкIэ шIэжьым ыкIи дзэ щытхъум я Илъэсэу щыгъэнэфагъ.

Ащ епхыгъэу илъэсым къы­кIоцI мэфэкI Iофтхьэбзэ зэфэшъхьафхэу щыIэщтхэр Хэгъэгу зэошхом ихъугъэ-шIагъэхэр, ащ хэтыгъэхэр зэлъягъэшIэгъэнхэм, тарихъ шIэжьыр гъэпытэгъэным ыкIи ухъумэгъэным афэгъэхьыгъэщтых.

ШIэжь Iофтхьабзэу «Блокаднэ хьалыгъу» зыфиIорэмкIэ илъэсыр Адыгеим щаублагъ. Ащ зэо лъэхъаным Ленинград дэубытагъэ хъугъэгъэ цIыфхэм ялIыхъужъныгъэ, хэгъэгум пыбзы­кIыпагъэ хъугъэгъэ къалэм ицIыфхэм къинэу ащэчыгъэр, пыим пэуцужьыгъэнымкIэ пыта­гъэу къахэфагъэр къеIуатэ. Хьалыгъу бзыгъэ такъырэу грамми 125-рэ нахь мыхъущтыгъэм а охътэ анахь къиным цIыфхэр фалIэхэу зэрежэщтыгъэхэр, ащ апсэ къызэригъэнагъэр пщыгъупшэнэу зэрэщымытыр, непи хьалыгъур бгъэлъэпIэн, уфэсакъэу зепхьан зэрэ­фа­ер Iофтхьабзэм щыкIэгъэ­тхъыгъ.

ШIэжьым ыкIи дзэ щытхъум я Илъэс къыдыхэлъытагъэу АР-м и Лъэпкъ тхылъеджапIэ щылэ мазэм и 18-м къыщегъэжьаг­ъэу и 27-м нэс къэгъэлъэгъон ыкIи къиIотыкIын зэфэшъхьафхэр щызэхащэщтых: «Ленинград непокоренный», «Блокада Ленинграда» зыфиIорэ темэхэмкIэ цIыфхэм зэо къэбархэр алъагъэ­Iэсыщтых. Къэгъэлъэгъонхэу «Блокаднэ хьалыгъу грамми 125-у машIомрэ лъымрэ зы­хэпшыхьагъэр…», «Ленинградская поэма», стендхэу «Летопись блокадного Ленинграда», «Надежда и жизнь: хлеб в блокадном Ленинграде» зыфиIохэрэр, фильмэу «Бесленей: право на жизнь» зыцIэр тхылъеджапIэм кIохэрэм арагъэлъэгъущтых.

Джащ фэдэу щылэ мазэм къыкIоцI Лъэпкъ тхылъеджапIэм тарихъ сыхьатхэр, зэIукIэгъухэр, тхылъ лъэтегъэуцор щыкIощтых. Заохэр щымыIэнхэм, мамырныгъэр гъэпытэгъэным зыгукIэ дезыгъэштэрэ цIыфхэр зэкIэ мыхэм ахэлэжьэнхэ алъэкIыщт.

(Тикорр.).