Нэбгырэ 11-мэ зыщаушэтыщт

Урысыем инеущырэ мафэ зыIэ илъэу, пэщэныгъэм мэхьанэу иIэр къызыгурыIоу ыкIи ар дэгъоу зыгъэцакIэхэрэм алъэныкъокIэ зэхащэгъэ зэнэкъокъоу «Лидеры России» зыфиIорэр тикъэралыгъо ящэнэрэу щырагъэкIокIы.

Iофтхьабзэм пшъэрылъэу иIэр тапэкIэ гъэхъэгъэшIухэр зышIын амал зиIэ пащэхэр къыхэгъэщыгъэнхэр, ахэм IэпыIэгъу афэхъугъэныр ары.

Зэнэкъокъум зэхъокIыны­гъэхэр фашIых, ау зэфэхьысыжьэу Iофтхьабзэм иIэр зы — ышIэрэм къыщымыуцоу, ыпэ­кIэ гъэхъагъэхэр зышIын гухэлъ зиIэхэм къэралыгъом ишIуагъэ аригъэкIыныр ары.

БлэкIыгъэ илъэсхэм афэдэу заочнэ шIыкIэмкIэ зэфэхьысыжь дэгъухэр къэзыгъэлъэ­гъуа­гъэхэр федеральнэ шъо­лъырхэм ащыкIощт финалны­къохэм ахэлэжьэщтых. Къыблэ федеральнэ шъолъырымкIэ Iоф­тхьабзэр Ро­стов-на-Дону щыкIощт. Мэзаем и 7-м къыщыублагъэу и 9-м нэс ащ зыщаушэтыщт. Адыгеим щыщ нэбгырэ 11 Iофтхьа­бзэм хэлэжьэщт.

«Лидеры России» зыфиIорэ зэнэкъокъум мыгъэ нэбгырэ 233830-мэ зыкъыщагъэлъэгъуагъ, ахэм ащыщэу 20141-р Къыблэ федеральнэ шъолъырым щыщых.

Ростов-на-Дону щыкIощт зэ­нэкъокъум хэлажьэхэрэр гъэтха­пэм и 27-м къыщегъэжьагъэу и 31-м нэс щыIэщт суперфиналым ихьанхэм фэбэнэщтых.

Зэнэкъокъум ишапхъэхэм къызэрэдалъытэрэмкIэ, суперфиналым нэбгырэ 300 ихьащт, текIоныгъэр нэбгыри 100-мэ къафагъэшъошэщт. ТапэкIэ яшIэ­ныгъэхэм ахагъэхъоным фытегъэпсыхьэгъэ сомэ миллион хъурэ грантыр къаратыщт. Джащ фэдэу къэралыгъом пэщэныгъэ щызезыхьэхэрэм Iоф адашIэн амал яIэщт.

Шъугу къэтэгъэкIыжьы «Россия — страна возможностей» зыфиIорэ платформэм зэнэкъо­къур зэрипроектыр. УФ-м и Президентэу Владимир Путиныр зэнэкъокъум изэхэщэн кIэ­щакIо фэхъугъ.

(Тикорр.).