Илыягъэу псы амыугъоинэу къяджэ

Адыгэ Республикэм икъушъхьалъэхэм бэшIагъэу къызэращемысыгъэм ыкIи къызэращемыщхыгъэм къахэкIэу Мыекъопэ псырыкIуапIэм псы къыIэкIэзыгъэхьэрэ къэкIопIэ шъхьаIэхэм арытым къыщыкIагъ. Ащ епхыгъэу шэпхъэ гъэнэфагъэм тетэу псыр къатызэ ашIыщт.

ПсыубытыпIэхэм яIофхэр гъэтэрэзыгъэн­хэм, котельнэхэмрэ социальнэ мэхьанэ зиIэ псэуалъэхэмрэ къызэтемыгъэуцогъэн­хэм атегъэпсыхьагъэу ошIэ-дэмышIэ тхьамыкIагъохэр къэмыгъэхъугъэн­хэмкIэ, машIом зыкъымыштэнымкIэ комиссием унашъо ышIыгъ 2020-рэ илъэсым щылэ мазэм и 17-м къыщегъэ­жьагъэу шэпхъэ гъэнэфагъэм тетэу Мые­къуапэ дэсхэм псы аIэкIэгъэхьэгъэнэу.

Мафэ къэс сыхьатыр 6.00-м къыщегъэжьагъэу 9.00-м нэс ыкIи сыхьатыр 19.00-м къыщегъэжьагъэу 22.00-м нэс Мыекъуапэ дэсхэм псыр икъоу къа­IэкIэхьащт. НэмыкI уахътэхэм ар нахь макIэу къатыщт.

Ащ къыхиубытэщтых къалэм игупчэ, Шэуджэн къэлэ цIыкIукIэ заджэхэрэм, Михайловым имикрорайон, урамэу Железнодорожнэм ыужкIэ къикIырэ я 2-рэ урамхэм атесхэр. Фэтэрыбэу зэхэт унэхэм яапэрэ къатхэм атесхэми, чIылъэ унэ зиIэхэми псыр икъоу аIэкIэхьащт.

Гавердовскэ артезианскэ псыубытыпIэм зэрепхыгъэхэм къыхэкIэу псыр икъоу аIэкIэхьащт Черемушкэм, къутырэу Гавердовскэм, поселкэу Западнэм, станицэу Ханскэм, къутырэу Веселэм адэсхэм.

Муниципальнэ образованиеу «Къалэу Мыекъуапэ» иадминистрацие къэлэдэс­хэм ялъэIу псымкIэ Iофхэм язытет хъугъэр къагурыIонэу, илыягъэу ар амыугъоинэу.
Мыекъуапэ имэрие ипресс-къулыкъу муниципальнэ унитарнэ предприятиеу «Майкопводоканалым» идиспетчерскэ къулыкъу ителефон къеты: 8 (8772) 52-26-09.