«ЭкоЦентрэм» къеты

Зэпыу фэмыхъоу

ИлъэсыкIэ мэфэкI мафэу кIуагъэхэм шъолъыр операторым зэпыу имыIэу Iоф ышIагъ. Техникэ зэфэшъхьаф 60-мэ пыдзэфэ кубометрэ мин 23,5-рэ дащыгъ.


— ИлъэсыкIэ зыгъэпсэфыгъо мафэхэм сыдигъокIи хэкIыр нахьыбэ мэхъу, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый. — МэфэкIым пае шIухьафтынхэр, IэшIу-IушIу­хэр цIыфхэм зэратыжьых, ахэр зыкIоцIылъыгъэхэр къырахыжьых, шхыныгъоу агъэхьазырырэр бэ, ахэми хэкIэу къапыкIырэр макIэп. А зэпстэур къыдэтлъыти, а мафэхэм тиIофшIэн нахь дгъэлъэшыгъ. Щылэ мазэм и 1-м къыщыублагъэу и 8-м нэс оперативнэ купэу зэхэтщагъэр республикэм къыщекIокIыгъ. Ащ хэтхэм хэкIитэкъупIэ площадкэхэр къакIухьэзэ контейнерхэр зэрэушъагъэхэм зыщагъэгъозагъ, нахьыбэу къызщыратэкъугъэм автомашинэхэр агъэкIуагъэх.

Ащ имызакъоу, мэфэкI мафэхэми зэпымыоу диспетчер къулыкъуми Iоф ышIагъ, цIыфэу къытеохэрэм яупчIэхэм джэуапхэр аратыжьыгъэх. Телефонхэр джыри зэ шъугу къэтэгъэкIыжьых: 8.962-868-14-62, 8.800-707-05-08.

Елкэхэр зыдэпхьыщтхэр

ИлъэсыкIэ мэфэкIым елкэу агъэуцугъагъэхэр къырахыжьыхэмэ зыдахьыщтхэм цIыфхэр бэрэ къыкIэупчIэх.

Ахэр пыдзэфэ инхэм ахалъытэх ыкIи нэмыкI пыдзэфэ инхэм ягъусэу шъолъыр операторым егъэ­кIодыжьых. Ащ фэшI, елкэу агъэкIэрэкIэгъагъэхэр къызырахыжьхэкIэ, контейнерхэр зытет площадкэхэм е хэкIитэкъупIэу гъэнэфагъэм ащагъэтIылъынхэ фае.

Контейнерым елкэр иплъхьэ зэрэмыхъущтыр джыри зэ шъугу къэтэгъэкIыжьы. Сыда пIомэ, ащ чIыпIэшхо щеубытышъ, нэмыкIэу къырахырэр ифэжьырэп, хэкIыр дэзыщырэ автомашинэми ибгъэуцон плъэкIыщтэп.

ГъэпсэфыпIэ чIыпIэхэр къэбзэнхэм

Предпринимателэу ыкIи юридическэ лицэхэу шъолъыр операторым хэкIыр зэрэIуищыщтымкIэ зэзэгъыныгъэ дэ­зы­­мышIыгъэхэм якъыхэгъэщынкIэ уплъэкIунхэр джырэблагъэ Мые­къо­пэ районым ит поселкэу Ка­мен­но­мостскэм щыкIуагъэх.

Мыщ зекIоу къакIохэрэр къыщыуцунхэу хьэкIэпIэ унэхэр дэтых. ООО-у «ЭкоЦентрэм» и Адыгэ шъо-лъыр къутамэ ипащэу Алыбэрд Налбый къызэри­IуагъэмкIэ, ахэм ащыщхэм хэкIым идэщын фэгъэ-хьыгъэ хэбзэгъэуцугъэр аукъо, зэзэгъыныгъэ къадашIынэу фаехэп. Арэу щытми, хэкIэу аугъоигъэр игъом къыдащышъ, итэкъупIэу гъэнэфагъэм къагъэтIылъы.

Ащ фэдэ хэукъоныгъэ зышIэу агъэунэфыгъэхэм зэкIэми компанием уплъэкIунхэр ащызэхищэщтых, прокуратурэри, тыкъэзыуцухьэрэ дунаим икъэухъу­мэнкIэ ыкIи чIыопсым икъэкIуапIэхэмкIэ ГъэIорышIапIэри ахэм ахэлэжьэщт. Шъугу къэтэгъэкIыжьы, экологическэ ыкIи санитарнэ шапхъэхэр зыукъорэ физическэ лицэхэм — сомэ 2000, пэщэ IэнатIэр зы­Iыгъхэм — 30000, юридическэ лицэхэм — 250000-м нэсэу тазыр арагъэтыщт. Джащ фэдэу чэщ-зымэфэ 90-м къыкIоцI Iоф ашIэн фимытхэу зэфашIынхэуи хэбзэгъэуцугъэм къыщеIо.

ООО-у «ЭкоЦентрэм» и Адыгэ шъолъыр къутамэ ипресс-къулыкъу