ЯIэшIагъэхэмкIэ къыраIотыкIыгъ

Лъэпкъ проектэу «Автомобиль гъогухэр щынэгъончъэнхэр ыкIи шэп­хъэшIухэм адиштэнхэр» зыфиIорэм хэхьэрэ федеральнэ программэу «ГъогурыкIоныр щынэгъончъэным» къыдыхэлъытагъэу «ИлъэсыкIэ джэ­голъэ анахь дэгъу» зыфиIорэ зэнэкъокъу кIэлэцIыкIухэм афы­зэ­ха­щэгъагъ. ГъогурыкIоныр щынэгъончъэныр джэгуалъэхэм къыра­IотыкIынэу щытыгъ.

Мы зэнэкъокъур зэхащэнымкIэ Адыгеим и ЛIышъхьэу Къум­пIыл Мурат IэпыIэгъу къафэ­хъугъ.

Тиреспубликэ иублэпIэ классхэм ащеджэхэрэм яIофшIэгъэ 500-м ехъу Адыгеим и Къэралыгъо автоинспекцие къыфэ­кIуагъ.

НыбжьыкIэ цIыкIухэм яIэшIагъэхэм гъогу тамыгъэхэм ыкIи нэфрыгъуазэм ямэхьанэ къащыраIотыкIыгъ, джащ фэдэу урысые социальнэ Iофтхьабзэу илъэс реным рагъэкIокIыгъэхэри ащыгъупшагъэхэп.

Нэбгырэ пэпчъ иIофшIагъэ зэрифэшъуашэу уасэ фашIыгъ ыкIи сертификаткIэ хагъэунэфыкIыгъ. Анахь IофшIэгъэ дэгъухэр зышIыгъэхэр Адыгеим и ЛIышъхьэ ыцIэкIэ агъэуцурэ ел­кэм рагъэблэгъагъэх. Ащ мэфэкI шIыкIэм тетэу щафэгу­шIуагъэх, дипломхэр ыкIи шIу­хьафтынхэр щаратыжьыгъэх.

КIымэфэ зыгъэпсэфыгъохэм япэгъокIэу гъогурыкIоным ишапхъэхэм кIэлэцIыкIухэм хэ­шIыкIэу фыряIэр мыщ фэдэ зэнэкъокъухэм нахь зэрагъэпытэщтым полицием икъулы­къушIэхэм яцыхьэ телъ.