МэфэкI Iофтхьабзэу зэрахьащтхэр

Тыгъэгъазэм и 21-м къыщегъэжьагъэу Мыекъуапэ мэфэкI, спорт Iофтхьэбзэ зэфэшъхьафхэр щызэрахьэх ыкIи щызэрахьащтых.

Ахэм ащыщхэм нэIуасэ шъуа­фэтшIын. Урамэу Советскэм (переулкэу Красноармейскэм къыщежьэу урамэу Победэм нэс) тыгъэгъазэм и 28-м илъэсыкIэ ермэлыкъ щыкIощт. Щылэ мазэм и 1 – 10-м къалэм испорт площадкэхэм джэгукIэ лъэпкъ зэфэшъхьафхэмкIэ кIымэфэ фестиваль, шахматхэмкIэ, теннисымкIэ мэфэкI зэнэкъокъухэр ащыкIощтых.

Лениным ыцIэ зыхьырэ гупчэм тыгъэгъазэм и 14-м къыщегъэжьагъэу щылэ мазэм и 14-м нэс шхыныгъохэмрэ музыкэмрэ яфестиваль щы- кIощт.

Тыгъэгъазэм и 29-м нэс кIэлэцIыкIухэм апае къэгъэлъэгъон, джэгукIэ, зэнэкъокъу зэфэшъхьафхэр зэхащэщтых. ИлъэсыкIэ елкэ шъхьаIэм дэжь къашъохэр къыщашIыщтых, спорт зэнэкъо­къухэр, чэфыгъо зыхэлъ нэ­мыкI Iофтхьабзэхэр щызэрахьащтых. Щылэ мазэм и 7-м къалэм итворческэ коллективхэм мыщ концерт къыщатыщт. ИлъэсыкIэ елкэ шъхьаIэм фэгъэхьыгъэ мэфэкI программэу щылэ мазэм и 12-м щыIэщтым къэлэдэсхэр хэлэжьэнхэ алъэкIыщт.

КультурэмкIэ къэлэ паркым тыгъэгъазэм и 21-м къыщегъэ­жьагъэу мафэ къэс мэфэкI Iоф­тхьэбзэ зэфэшъхьафхэр щэкIох. Зыныбжь илъэс 50-м шъхьадэкIыгъэхэм апае мэфэкI дискотекэхэр тыгъэгъазэм и 28-м, щылэ мазэм и 7-м зэхащэщтых. Щылэ мазэм и 8-м нэс кIэлэцIыкIухэм апае зэнэкъокъу, джэгукIэ зэфэшъхьафхэр, дискотекэхэр елкэм дэжь щызэхащэщтых, пшысэхэм ахэт геройхэм нэIуасэ щафашIыщтых. Тыгъэгъазэм и 31-м атлетикэ псынкIэмкIэ зэнэкъокъу щыкIощт. Щылэ мазэм и 7-м «Рождественская сказка» зыфиIорэ мэфэкI концертым къэлэдэсхэри хьа­кIэхэри еплъынхэ алъэкIыщт.

КультурэмкIэ къэлэ Унэу «Гигант» зыфиIорэм щылэ мазэм и 3-м ИлъэсыкIэ елкэхэм яя VII-рэ къэлэ зэнэкъокъоу «Арт-елка-2020» зыфиIорэр къы­щызэIуахыщт. Зигугъу къэтшIыгъэ зэнэкъокъум къырахьылIэщт IофшIагъэхэм якъэгъэлъэгъон щылэ мазэм и 3 – 8-м сыхьатыр 11.00-м къыщегъэжьагъэу сыхьатыр 16.00-м нэс шъукIон шъулъэ­кIыщт. Джащ фэдэу мы мафэхэм елкэхэм афэгъэхьыгъэ муниципальнэ мэфэкI Iофтхьабзэхэм кIэлэцIыкIухэр ащычэфыщтых.

Поселкэу Родниковэм щылэ мазэм и 5-м сыхьатыр 12.00-м джэгукIэу «Сказка, чудо в Рождество» зыфиIорэр щызэхащэщт. Щылэ мазэм и 12-м сыхьатыр 12.00-м «Новогодний серпантин» зыфиIорэ концертыр мыщ щыпсэухэрэм къафатыщт.

Станицэу Ханскэм щылэ мазэм и 4-м сыхьатыр 12.00-м кIэлэцIыкIухэм апае джэгукIэ зэфэшъхьафхэр культурэм и Унэу ащ дэтым щызэхащэщтых. Елкэм фэгъэхьыгъэ мэфэкI Iоф­тхьабзэхэр зэраухыхэрэмкIэ щылэ мазэм и 12-м культурэм и Унэ цIыфхэр щычэфыщтых.

Поселкэу Подгорнэм культурэм и Унэу дэтым псэупIэм дэсхэм апае концертэу «Чудеса под Новый год!» зыфиIорэр тыгъэгъазэм и 29-м сыхьатыр 13.00-м щыкIощт, тыгъэгъазэм и 31-м сыхьатыр 21.00-м илъэсыкIэ Iофтхьабзэхэу чэфыгъо зыхэлъыщтхэр мыщ щызэрахьащтых. Щылэ мазэм и 7-м пчы­хьэзэхахьэу «Рождественские гулянья» зыфиIорэр щыкIощт.

Къутырэу Гавердовскэм щылэ мазэм и 6-м сыхьатыр 14.00-м мэфэкI программэу «Накануне Рождества» зыфи­Iорэр щы­кIощт.