Ныбджэгъу лъапIэхэр!

Непэрэ тедзэгъур зыфэгъэхьыгъэр зэкъош республикищым: Къэбэртэе-Бэлъкъарым, Къэрэщэе-Щэрджэсым ыкIи Адыгеим къащыхаутыхэрэ лъэпкъ гъэзетхэу «Адыгэ псалъэм», «Черкес хэкум» ыкIи «Адыгэ макъэм» язэхэт номерхэр къызыдэкIырэр илъэс 30 зэрэхъугъэр ары. Зы адыгэ лъэпкъэу тыщытми, рес­публикищэу тыгощыгъ, зы чIыпIэм тыщыпсэурэп, ау тапэкIэ лажьэщтыгъэ редакторхэм, журналистхэм яакъыл къыхьи мыщ фэдэ лъэбэкъушIу ашIы­гъагъ, мэзищым зэ зэхэт тедзэгъухэр къыдагъэкIынхэу рахъу­хьэгъагъ.

Унашъоу а лъэхъаным ашIыгъагъэм тытетэу мэзищ тешIэ къэс зэхэт тедзэгъухэр тэгъэхьазырых, къыхэтэутых. Непэрэр зыфэгъэхьыгъэр илъэс щэкIым къыкIоцI мы Iофы­гъошIум къыкIугъэ гъогур, ащ игъэпсын, идэлэжьакI ыкIи ащ епхыгъэ гупшысэхэр ары. Тызэкъотмэ тызэрэлъэшыр къыд­гурыIозэ тапэкIи тызэ­дэлэжьэныр тимурад.

Гъэзетэу «Адыгэ макъэм» иредакцие