«Налмэсым» лъэпкъхэр зэфещэх

Адыгэ Республикэм и Къэралыгъо академическэ ансамблэу «Нал­мэсымрэ» республикэм ифилармоние и Къэралыгъо симфоническэ оркестрэрэ зэгъусэхэу апэрэу концерт къызэдатыгъ.

Лъэпкъ къашъохэм яорэ­ды­шъохэр симфоническэ оркестрэм ыгъэжъынчыхэзэ, «Нал­мэсыр» концертым щыуджыныр Iоф къызэрыкIоп. Пэсэрэ лъэхъаным къыщыублагъэу адыгэхэм къэшъо дахэхэр яIэх. Адыгэхэм яуджхэм уяплъызэ, орэдышъом нахь зегъэушъомбгъугъэн зэрэфаер искусствэм хэшIыкI фызиIэхэм къаIоу бэрэ зэхэтхыгъ.

ШыкIэпщынэм, Iупэпщынэм, шъонтырыпым, пхъэкIычым яамал­хэр ашIэх. Пщынэри лъэпкъ искусствэм пытэу къыхэуцуагъ. Арэу щытми, лъэ­хъаным диштэу адыгэ орэды­шъом нахь зиIэтынымкIэ сим­фоническэ оркестрэм иамал­хэри бгъэфедэнхэ плъэкIыщт.

Концертыр

«Налмэсым» къышIыхэрэ къашъохэм, артистхэм шъуашэу ащыгъым, ансамблэм щытхъоу фаIорэм афэгъэхьыгъэ нэры­лъэгъу IэпыIэгъухэр чIэхьапIэм дэжь дахэу къыщагъэлъэгъуагъэх. «Налмэсыр» зышIогъэшIэгъонхэм хъугъэ-шIагъэхэм на­хьышIоу защагъэгъозагъ, шъуа­шэхэм апашъхьэ уцухэзэ нэпэеплъ сурэтхэр атырахыгъэх.

Концертыр шIуфэс къа­шъомкIэ аублагъ. «Тыргъэтаор», «Ижъырэ къашъор», «Ныб­жьыкIэ къашъор» зэхэтхэу Бэрзэдж Дианэ, Хьатитэ Аминэт, Едыдж Гушъао, Симболэт Сусанэ, Хьажэкъо Пщымафэ къашIыгъ. «ЗекIо зыгъэлъатэр» Къулэ Алый къыхедзэ. Пэсэрэ къашъоу «Ислъамыер» Бэрзэдж Дианэрэ Едыдж Гу­шъаорэ къагъэлъэгъуагъ.

Къашъо пэпчъ лъэпкъ гу­пшы­сэу хэлъыр артистхэм къы­зэ­Iуахы. «Тыргъэтаом» псэ къы­пызыгъэкIэрэ Д. Бэрзэджыр «Ислъамыем» нэгушIоу щыо­лъэгъу. Сэе фыжьыр ыгъэ­быбатэзэ къызэрэшъорэм гур къеIэты, нэмыкI къэшъуакIохэми узыIэпащэ.

«Адыгэ уджхэр» зыфиIорэм лъэпкъыр зэфэзыщэрэ шIыкIэшIухэр къыхэщых. Шъуашэхэр уцышъох, плъыжьых… Къэшъуа­кIохэр зэфэнэгушIох. Жьыр акIэтэу зэрэуджыхэрэм лъэпкъ шIэжьыр къеIэты.

«Налмэсыр къэшъо» зыфи­Iорэм лъэпкъ шъуашэм идэхагъи, тишэн-хабзэхэри къыхэщых. «Кавказ мэкъамэхэр» шъонтырпаохэм зэдырагъа­штэзэ къашIыгъ.

«Абхъаз ныбжьыкIэ къа­шъор», Тыркуем щыпсэухэрэ тилъэпкъэгъухэм яхьылIагъэр, нэмыкIхэри шэпхъэ лъагэхэм адештэх. Къулэ Алыйрэ ЕхъулIэ Тэмарэрэ къашъом икIэщакIох. Артистхэм шъуашэр «къагъэгущыIэу» тэлъытэ. Къа­мэхэр къычIэзысэрэ Шагудж Батурай, адыгэу IэкIыб къэралыгъохэм ащыIэхэм якъашъо, къыхэзыдзэрэр Симболэт Бис­лъан, фэшъхьаф къашъохэр зэ­лъэпкъэгъухэм яджэрпэджэ­жьых.

Абхъазым, Тыркуем, Сирием, Къэбэртэе-Бэлъкъарым, Къэрэщэе-Щэрджэсым, Краснодар краим, нэмыкIхэм къарыкIыгъэхэр концертым зэфищагъэх. «Налмэсым» илъэсыбэрэ къыщышъуагъэу, Адыгэ Республикэм инароднэ артистэу НэмытIэкъо Аслъан хьакIэу къытфэкIуагъэхэм ахэтэу гущыIэ фабэхэр къыIуагъэх. Зэлъэпкъэгъухэм зэхэт гъэзетхэр къызэрэдагъэкIыхэрэм зэ­кIэми осэ ин фашIыгъ. Лъэп­къыр зэфэзыщэрэ Iофыгъохэм тапэкIи артистхэр зэрахэлэжьэщтхэр къытаIуагъ. «Налмэсым» ихудожетвеннэ пащэу Хъоджэе Аслъан ансамблэр ыпэкIэ зэ­рэлъыкIотэщтыр зэхахьэм щы­хигъэунэфыкIыгъ.

ЕмтIылъ Нурбый.
Сурэтыр зэхахьэм къыщытетхыгъ.