Къуекъо Налбый фэгъэхьыгъ

Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм къэгъэлъэгъон зэфэ­шъхьафхэр шэкIогъум, тыгъэгъазэм щыкIуагъэх.

Драматург цIэрыIоу Мамый Ерэджыбэ ытхыгъэхэр жъы хъу­хэрэп. «Дэхэбаринэ ихьакIэщ» артист цIэрыIохэу КIыкI Юрэ, Кушъу Светланэ нэмыкIхэри хэлажьэх. «ГъашIэм имэзищ» зыфиIоу театрэм къыщагъэлъэгъуагъэр режиссерэу Хьакъуй Аслъан ыгъэуцугъ.

Режиссерэу Исуп Тимур урысыбзэкIэ ыгъэуцугъэу «Слуга двух господ» зыфиIорэм уеплъын­кIэ гъэшIэгъоны. Артистхэр дахэу фэпагъэх, рольхэр къашIыхэзэ шIыкIэшIухэр къызэдагъотых.

IэнэтIэшхо зиIэри, пщэрыхьа­кIори, пхъэнкIакIори шIулъэгъум «егъэсымаджэх». «Дэхэбаринэ ихьакIэщ», зигугъу къэтшIыгъэ спектаклэу урысыбзэкIэ къашIыгъэр зэтэгъапшэх. Дэхэбаринэ псэлъыхъуабэ иI, ау апэрэ шIу­лъэгъур зыфишIыгъэ кIалэу дунаим ехыжьыгъэр щызыгъэгъу­пшэн къахэкIырэп. Зыми дэмыкIоу зэрэщысыр артисткэу Кушъу Светланэ IупкIэу къызэIуехы.

Т. Исупым испектаклэ нэбгырабэ шъхьэгъусэ зэфэхъуным ехьылIэгъэ гупшысэр щыпхырещы. ШIулъэгъум дихьыхыгъэ пшъа­шъэм хъулъфыгъэ щыгъыныр зыщелъэ, ыгу рихьырэ кIалэм IукIэзэ зэфыщытыкIэшIухэр зэ­дашIых…

ШIулъэгъур кIочIэ лъэшэу зэрэщытыр искусствэм ыбзэкIэ къыбгурыIоным имэхьанэ режиссерхэм къыхагъэщы. Артистхэу Къэбэхь Евгение, Исуп Тимур, Ахъмэт Артур, Къуижъ Людмилэ, Муратэ Рустам, Петр Парфировым, Болэкъо Адамэ, Уайкъокъо Асыет, Зыхьэ Зуралбый ярольхэм псэ къапагъэкIагъ. ЯгущыIи, якъа­шъуи узэлъаштэ, едзыгъом кIэу­хэу фэхъущтыр къэшIэгъошIоп.

ТхэкIо цIэрыIоу, драматургэу Къуекъо Налбый къызыхъугъэр илъэс 80 зэрэхъугъэм фэгъэхьыгъэ пчыхьэзэхахьэр непэ театрэм щыкIощт. КъэшIынэу «СылIэмэ — сыжъугъэтIылъыжь» зыфиIорэм щыщ пычыгъохэр къагъэлъэгъощтых, игущыIэхэм атехыгъэ орэдхэр зэхахьэм щыжъынчыщтых.

— ИIофшIагъэхэмкIэ непи къы­зэрэтхэтыр, Къуекъо Налбый лъытэныгъэ зэрэфэтшIырэр къэтIотэщт, экранышхом къытыри­дзэрэ къэгъэлъэгъоныр тиIэпыIэгъоу Налбый иIофшIагъэ тытегущыIэщт, тхакIом ымакъэ зэхэтхыщт, — къытиIуагъ пчыхьэзэхахьэм ирежиссерэу, зэхэщэкIо купым хэтэу, Адыгэ Республикэм искусствэхэмкIэ изаслуженнэ IофышIэшхоу Хьакъуй Аслъан.

Зэхахьэр сыхьатыр 18.30-м Лъэпкъ театрэм щырагъэжьэщт.
Сурэтхэр къэгъэлъэгъонхэм къащытетхыгъэх.