Сабыйхэр зэрыс унагъохэм къэралыгъо IэпыIэгъоу аратырэр

Сомэ мин 50 хъурэ зэтыгъо ахъщэ IэпыIэгъур

Адыгэ Республикэм и Законэу «Унагъом, ным, тым ыкIи кIэлэцIыкIухэм якъэухъумэн» зыфиIорэм зэхъокIыныгъэхэр фэшIыгъэнхэм епхыгъэ Законым 2019-рэ илъэсым шэкIогъум и 24-м къыщыублагъэу кIуачIэ иIэ хъугъэ. Ащ диштэу ящэнэрэ сабыир ыкIи къыкIэлъыкIохэрэр къызэрыхъухьэгъэ унагъохэм (е зыпIунэу зышта­гъэхэм) сомэ мин 50 зэтыгъо ахъщэ IэпыIэгъу араты. Ахъщэр заIэкIагъахьэрэр сабыир къызыхъугъэм (апIунэу заштагъэм) ыуж мэзи 3 зытешIэкIэ ары.


Ау унагъохэм ашIэн фае сабыим ыныбжь мэзи 3 зыхъурэм къыщегъэжьагъэу мэзи 6-м нахьыбэ тырамыгъашIэу ахъщэр къаратыным пае къулыкъу гъэнэфагъэхэм зафагъэзэн зэрэфаер.

ШэпхъакIэу щыIэ хъугъэхэм къахиубытэхэрэр 2019-рэ илъэсым шэкIогъум и 24-м ыуж къэ­хъугъэ сабыйхэр ары.

Ны-тыхэр чIыпIэу зыщыпсэухэрэм елъыты­гъэу ЗАГС-м кIэлэцIыкIухэу къэхъугъэхэр щыдэтхагъэхэу щытынхэ зэрэфаер зыщагъэгъупшэ хъу­щтэп.

Нахь игъэкIотыгъэу шапхъэхэм защызыгъэгъуазэ зышIоигъохэм цIыфхэр социальнэу ухъу­мэгъэнхэмкIэ учреждениехэу ежьхэр зыщыпсэухэрэ чIыпIэм щыIэхэм зафагъэзэн алъэ- кIыщт.

Апэрэ сабыир къызэрыхъухьэгъэ (зыпIунэу зыштэгъэ) унагъохэм мазэ къэс аратыщт ахъщэр

Апэрэ сабыир къызэрэхъу­гъэм (апIунэу зэраштагъэм) пае ыныбжь илъэси 3 охъуфэ нэс мазэ къэс ахъщэ къаратызэ зэрашIырэр къихьэрэ 2020-рэ илъэсми лъагъэкIотэщт. Зы илъэс, илъэ­ситIу, илъэсищ охъу­фэ нэс ахъщэр къаратыщт. Ау пIалъэу зигугъу къэтшIыгъэр къэсымэ, лъэIу тхылъымрэ документхэу ищыкIагъэхэмрэ агъэ­кIэжьынхэ фае.

Унагъохэу 2018-рэ илъэсым щылэ мазэм и 1-м къыщыублагъэу апэрэ сабыир къызыфэхъу­гъэхэм ыкIи ахъщэ зэратынэу агъэнэфагъэхэм цIыфхэр социальнэу ухъумэгъэнхэмкIэ учреждениехэм зафагъэзэн алъэ­кIыщт ахъщэм икъэтынкIэ пIа­лъэр афылъагъэкIотэным пае.

Ахъщэр зэратыхэрэр унагъо­хэу нэбгырэ телъытэу гурытымкIэ зихахъо урыпсэунымкIэ анахь ахъщэ макIэу Адыгэ Республикэм щагъэ­нэфагъэм фэдитIум шIомыкIыхэрэр ары. Апэрэ сабыир къызыфэхъу­гъэхэм 2020-рэ илъэсым ма- зэ къэс къаратыщтыр сомэ 9599-рэ.

Ящэнэрэ ыкIи къыкIэлъыкIорэ сабыйхэр къызэрыхъогъэ унагъохэу фэныкъоу псэухэрэм мазэ къэс ахъщэу аратыщтыр

2019-рэ илъэсым тыгъэгъазэм и 31-м ыуж къэхъугъэ ящэнэрэ ыкIи ащ къыкIэлъыкIогъэ кIэлэцIыкIухэр зыпIурэ унагъохэу фэныкъоу псэухэрэм мазэ къэс ахъщэ къаратызэ ашIыщт кIэлэцIыкIухэм аныбжь илъэси 3 охъу­фэ нэс.

КIэлэцIыкIур къызыхъугъэм ыуж мэзи 6 нахьыбэ тырамыгъашIэу къулыкъухэм зафагъэзэн фае ахъщэр игъом къаIэкIэхьаным пае.

КIэлэцIыкIухэр рыпсэунхэмкIэ анахь ахъщэ макIэу Адыгэ Рес­публикэм щагъэнэфагъэм фэдиз ахэм къаратыщт. 2020-рэ илъэсым ахъщэр зыфэдизыщтыр 9599-рэ.

Ахъщэр зэратыщтыр унагъохэу нэбгырэ телъы­тэу гурытымкIэ зихахъо анахь ахъщэ макIэу Адыгэ Республикэм щагъэнэфагъэм фэдитIум шIомыкIыхэрэр ары.

2020-рэ илъэсым щылэ мазэм и 2-м, и 5-м, и 6-м ыкIи и 8-м цIыф­хэр социальнэу ухъу­мэгъэнхэмкIэ учреждениехэм щарагъэблэгъэщтых.