ХьакIэзещэным лъыплъэнхэм фэшI

ШэкIогъум и 13-м джыри зы проектыкIэ Урысыем изекIон хъызмэт фэгъэхьыгъэу «гъогу техьагъ». Ащ зэреджагъэхэр «ХьакIэзещэным фэIэпэIасэхэр».

Проектым игъэцэкIэн профессионалхэри, туристическэ гупчэхэри, IофшIэныр езыгъэ­жьэгъакIэхэри хэлэжьэщтых, ащ Урысыем ишъолъыр пстэури къыхеубытэ.

Урысые Федерацием ивице-премьерэу Ольга Голодец къызэриIуагъэмкIэ, аужырэ илъэсхэм зекIон хъызмэтым гъэхъагъэу ышIыхэрэм ахэхъо. БлэкIыгъэ илъэсым зекIоным федэу къыхьыгъэм процент 11 хэхъогъагъэмэ, тызхэт илъэсыр къызихьагъэм къыщегъэжьагъэу а пчъагъэм тынэсыгъах. Илъэсыр екIыфэкIэ ащ джыри хэхъон зэрилъэкIыщтыр экспертхэм къаIо. Ар шIэхэу кIымэфэ зыгъэпсэфыгъор къызэрэсыщтым епхыгъ. Турфирмэхэми туроператорхэми кIымафэм зытырагъэпсыхьэ.

— Тикъэралыгъо зэзыгъэлъэ­гъунхэу IэкIыб хэгъэгухэм къарыкIхэрэ цIыфхэм агу рехьы, зыщаплъыхьаныр якIас. Ахэм япчъагъэ къыхэхъоным пае зе­кIоным иинфраструктурэ игъэ­псын икъоу Iоф дэтшIэн фае. Турцентрэхэм путевкэхэр кIымафэм зызыгъэпсэфыщтхэм аращэхэу рагъэжьагъ. Гупсэфыгъо яIэу, фэIо-фашIэхэр икъоу апагъохыхэ зыхъукIэ, IэкIыб хэ­гъэгухэм къарыкIыхэрэми тэ тицIыфхэми охътэ фабэхэми, чъыIэхэми загъэпсэфыным нахь тегушIухьащтых, — еIо О. Голодец.

ЗэкIэми къагурэIо зыгъэпсэфакIохэр дахэу къазы­щыпэ­гъокIыхэрэ, узэплъынкIэ гъэ­шIэгъон чIыпIэхэр зыдэщыIэхэ зыгъэпсэфыпIэхэм зыкIакIо­хэрэр. Ащ фэдэу цIыфхэм апэ­гъокIынхэм зырагъэсэнэу ыкIи зекIо хъызмэтым иин­фраструктурэ дэгъоу агъэпсыным пай проектыкIэу «ХьакIэзещэным фэIэпэIасэхэр» зыфиIорэр зыкIызэхагъэуцуагъэр.

Премьер-министрэу Дмитрий Медведевыр Урысыем туризмэм изэтегъэпсыхьан фэ­гъэхьыгъэ Стратегиеу агъэхьазырыгъэм блэкIыгъэ мазэм, чъэпыогъум кIэтхагъ. Ащ 2035-рэ илъэсым нэс шIэгъэнхэ фэе Iофыгъохэр къыделъытэх. ШIыкIэшIухэр агъэфедэхэзэ, хэкIыпIэхэр къагъотыхэзэ, зыгъэпсэфыпIэхэм къызэлъаубытхэрэ чIыпIэхэр, туристическэ гупчэ инхэр, объектыкIэхэр ыкIи инфраструктурэр агъэпсынхэу Стратегием къыделъытэх.