Пкъышъолыр псыхьэгъэным фэIорышIэх

Лъэпкъ проектэу «Демографием» къыдыхэлъытагъэу «Спорт — норма жизни» зыфиIорэ проектыр Адыгеим щагъэцакIэ. Ащ хэтэу республикэм воркаут-площадкищ (гъогум утетэу гимнастикэ зыщыпшIыщт чIыпIэ) щашIыщт.

Апэрэр станицэу Джаджэм къыщызэIуахыгъ. Адыгэкъали мыщ фэдэ щагъэпсынэу агъэнафэ. БэмышIэу Мыекъопэ районым ит псэупIэу Тульскэм ыпэкIэ зигугъу къэтшIыгъэ площадкэм ишIын щаухыгъ.

— Адыгэ Республикэм и ЛIышъхьэу КъумпIыл Мурат иIэпыIэгъукIэ Мыекъопэ районым ит псэупIэхэр аужырэ шапхъэхэм адиштэу гъэпсыгъэнхэм, цIыфхэр спортым пыщагъэхэ хъунхэм афытегъэпсыхьэгъэ Iофыгъохэр чанэу щытэгъэцакIэх. Районым щыпсэухэрэм мыщ фэдэ проектхэм къадырагъаштэ, — къыIуагъ районым ипащэу Олег Топоровым.

Мыекъопэ районым иадминистрацие ипресс-къу­лыкъу къызэритырэмкIэ, Тульскэм дэт гупчэ паркым игъэкIэжьын агъэнафэ зэхъум воркут-площадкэри къыдалъытэгъагъ. Ащ къыхэкIэу зыгъэпсэфыпIэм фытегъэпсыхьагъэу, зэкIужьэу чIыпIэр хъугъэ.

(Тикорр.).