Сабыйхэр зэрыс унагъохэм яфэгъэкIотэныгъэхэр зэкIэ ашIэнхэм пае партиеу «Единэ Россием» къэбар икъу угъоигъэнымкIэ ыкIи цIыфхэр щыгъэгъозэгъэнхэмкIэ урысые Iофтхьабзэу къырихьыжьагъэм шэкIогъум къыщыублагъэу кIуачIэ иIэ хъущт. 
Мыщ ишIуагъэкIэ хэгъэгум ишъолъыр пэпчъ щыпсэурэ унагъом фэгъэкIотэныгъэу иIэм зыщигъэгъуазэ шIоигъо хъумэ, пэщэ IэнатIэхэр а чIыпIэм щызыIыгъхэм зафигъэзэн ылъэкIыщт. Ащ фэгъэхьыгъэу къыIуагъ УФ-м и Къэралыгъо Думэ икомитетэу унагъом, бзылъфыгъэхэм ыкIи кIэлэцIыкIухэм яIофыгъохэм афэгъэзагъэм итхьаматэ иапэрэ гуадзэу Ольга Окуневам.
«Унагъохэу сабыйхэр зэрысхэм IэпыIэгъу ятыгъэнымкIэ Iофтхьэбзэ зэфэшъхьафыбэ шъолъыр ыкIи муниципальнэ къулыкъухэм рахъухьэ. А лъэныкъомкIэ хэбзэгъэуцугъабэу щыIэхэм защагъэгъозэныр, икъоу зэхафынхэр цIыфмэ къин къащэхъу. ГъэцэкIэкIо хабзэм икъулыкъу пстэуми ясайтхэм ащ фэгъэхьыгъэ къэбарыр арыбгъотэн плъэкIынэу зэрэщымытым Iофыр нахь къегъэхьылъэжьы. Джащ пае цIыфхэмкIэ нахь гурыIогъэшIу зэрэхъущтым тегъэпсыхьагъэу фэгъэкIотэныгъэхэм афэгъэхьыгъэ къэбарыр тыугъоиным ыкIи зэфэтхьысыжьыным пае сервис гъэнэфагъэ зэхэтщэнэу итхъухьагъ, — къыхигъэщыгъ О. Окуневам. — Унагъом IэпыIэгъоу ратын алъэкIыщтымкIэ къэбар икъу зэраIэкIэмыхьэрэм унагъом нахь зиушъомбгъунымкIэ изэрар къэкIо. ЦIыфхэр къэралыгъом къаритын ылъэкIыщт IэпыIэгъум икъоу щымыгъуазэхэ хъумэ, унагъом нахь зегъэушъомбгъугъэнымкIэ мурадэу яIэри нахь зэкIахьэ».
Адыгэ Республикэм и Къэралыгъо Совет – Хасэм идепутатэу, федеральнэ партийнэ проектэу «Унэгъо пытэр» зыфиIорэм икоординаторэу Адыгеим щыIэ Евгения Дьячковам партиеу «Единэ Россиер» кIэщакIо зыфэхъугъэ Iофтхьабзэм мэхьанэшхо зэриIэр къыхигъэщыгъ:
— Непэ тикъэралыгъо ихэхъоныгъэкIэ анахь мэхьанэ зиIэхэм ащыщ унагъомрэ ащ къыпкъырыкIырэ, ащ къытырэ шIуагъэхэмрэ. Сабыим тэрэзэу хэхъоныгъэ ышIынымкIэ къэралыгъом ищыкIэгъэ амалхэр регъэгъотых, унэгъо ныбжьыкIэхэм ыкIи сабыибэ зэрысхэм IэпыIэгъу афэхъу, сабый ибэхэм къарыкIорэм ынаIэ тырегъэты, демографие проектхэм атегъэпсыхьагъэу унагъохэм фэгъэкIотэныгъабэ афешIы. Ар дэгъуба! Ау ахэм язы Iахь цIыкIу ныIэп, гущыIэм пае, сабыибэ зэрыс унагъохэм ащыщэу фэгъэкIотэныгъэхэмкIэ фитыныгъэу иIэр къызфэзгъэфедэрэр. Ар къызхэкIырэр къэшIэгъуаеп —яфитыныгъэхэмрэ яфэгъэкIотэныгъэхэмрэ зэрамышIэхэрэр ары. Федеральнэ хэбзэгъэуцугъэу щыIэхэм нэIуасэ афэхъухэрэм шъолъырхэм яхэушъхьафыкIыгъэ нэшанэхэм къахэкIэу, IэпыIэгъу къафэхъунэу зызфагъазэмэ нахьышIум тырамыубытэшъоу къыхэкIы. А IофымкIэ зы сервис зыкI зэхэщэгъэныр партием игъоу зэрилъэгъугъэм обществэм дырегъаштэ. Къэралыгъом IэпыIэгъоу къытын ылъэкIыщтым сабыйхэр зэрыс унагъохэр зэкIэ щыгъуазэхэ хъумэ, яунагъохэм джыри нахь зарагъэушъомбгъуным тенэцIыхьащтых, нахь гу тырашIыхьащт.