Адыгеим и ЛIышъхьэу КъумпIыл Мурат игукъэкIкIэ мы мазэм и 23-м къыщыублагъэу и 25-м нэс къушъхьэу Фыщт ылъапсэ ныбжьыкIэ сэнаущхэм яящэнэрэ зэхахьэу «Фыщт-2019-рэ» зыфиIорэр щыкIощт. Мыгъэ ащ нэмыкI шъолъырхэри къыхэлэжьэщтых.
Адыгеим и ЛIышъхьэ Iофтхьабзэм къыригъэблэгъагъэх Къэбэртэе-Бэлъкъар, Къэрэщэе- Щэрджэс республикэхэм, Краснодар краим ялIыкIохэр. КъБР-м ыкIи КъЩР-м япащэхэм тапэкIи КъумпIыл Мурат игукъэкI къыдырагъэштэгъагъ ыкIи ащ хэлэжьэнхэмкIэ яшIоигъоныгъэ къыраIотыкIыгъагъ.
Адыгеим и ЛIышъхьэ ипресс- къулыкъу къызэритырэмкIэ, «Фыщт-2019-рэ» зыфиIорэ зэхахьэм нэбгырэ 300 фэдиз хэлэжьэнэу енэгуех – ахэр шъолъыр пащэхэр, общественнэ объединениехэм ялIыкIох, ныбжьыкIэхэу еджэным, спортым, гуфэкIо движением гъэхъагъэхэр ащызышIыгъэхэр арых.
ШышъхьэIум и 23-м пчэдыжьым жьэу Яворовэ хыгъэхъунэм пстэури щызэрэугъоинхэшъ, километри 10 зикIыхьэгъэ гъогууанэу Фыщт екIуалIэрэм техьащтых. Патриотическэ, экологическэ, спортивнэ ыкIи культурнэ Iофтхьабзэхэр къушъхьэ лъапсэм щызэхащэщтых.
Анахь шъхьаIэу хъущтыр шъолъыр пащэхэм ныбжьыкIэхэр гущыIэгъу зэрафэхъушъущтхэр ары. УпчIэу зыгъэгумэкIыхэрэр аратышъущтых, зигъо Iофыгъохэр зэдызэхафыщтых.
Шъугу къэдгъэкIыжьын, икIыгъэ илъэсым щыIэгъэ мыщ фэдэ зэхахьэр ары Адыгеим и ЛIышъхьэ игукъэкIэу волонтер движениеу «Тлъапсэхэр къэтэжъугъэухъумэх» зыфиIорэм егъэжьапIэ фэхъугъагъэр. Джы мы Iофтхьабзэм гъунэгъу шъолъырхэри къыхэлэжьэнхэм щэгугъых, тикъэралыгъо итарихъ ыкIи тыкъэзыуцухьэрэ дунаим якIэн икъызэтегъэнэжьынкIэ ар амалышIу хъущт.
«НыбжьыкIэ чанхэу гукъэкIхэр зиIэхэм апае тиреспубликэ щызэшIотхырэр бэ. ШIэныгъэ дэгъу зыIэкIэлъхэу гукъэкI гъэшIэгъонхэр зиIэхэр, зицыхьэ зытелъыжьхэу, зиIоф хэшIыкI дэгъу фызиIэхэр тищыкIагъэх. Гъэсэныгъэ дэгъу агъотыным, ясэнэхьат гъэхъагъэхэр щашIынхэм апае тэ тфэлъэкIыщтыр зэкIэ тэшIэ. ТилъэкI зэхэлъэу ныбжьыкIэ сэнаущхэм ягукъэкIхэр агъэцэкIэнэу амал яттыным мэхьанэшхо иI. НыбжьыкIэ зэхахьэу «Фыщт» зыфиIорэри ащ тегъэпсыхьагъ. Мы Iофыгъом зызэриушъомбгъурэр ыкIи къотэгъухэр нахьыбэу иIэ зэрэхъурэр сигуапэ», — еIо КъумпIыл Мурат.