IофшIэгъэ гъэшIэгъон

Мыекъопэ къэралыгъо технологическэ уни­верситетым хэт Политехническэ колледжым мы мафэхэм дипломнэ IофшIэнхэр къыщагъэшъыпкъэжьых.

Рационализаторскэ ыкIи изобретательскэ Iофым пыщэгъэ студентхэм ащ IофшIэгъэ гъэшIэгъонхэр къырахьылIагъэх. Ахэм ащыщ Павел Матвеенковым иIофшIагъэу коцыр Iузыхыжьырэ комбайнэр икъу фэдизэу къэплъыхьэгъэнымкIэ мэхьанэшхо зиIэ псэуалъэр.

Комбайнэм ычIэгъ укъычIэплъэныр, ащ унэсыныр къинэу щыт. Павел къыугупшысыгъэ пкъыгъом видеокамерэ зэрэхэтым ишIуа­гъэкIэ, узынэсын умылъэкIырэ чIыпIэу комбайнэм хэтхэм компьютерымкIэ е смартфонымкIэ уалъыплъэн плъэкIыщт.

— Павел мы Iофым ятIонэрэ курсым къыщегъэжьагъэу пылъыгъ. Шъыпкъэ, изэкъуагъэп, студентхэм япроектнэ-конструкторскэ бюро хэтхэр ащ ишIын хэлэжьагъэх, — еIо Политехническэ колледжым икIэлэегъаджэу Цыкъэжъыкъо Бислъан.

Сихъу Гошнагъу.