Лэжьыгъэр ухъумэгъэным…

Лэжьыгъэр, анахьыбэу бжыхьасэхэр, гъэмафэр ары зыIуахыжьыхэрэр. А уахътэм мэфэ фабэхэр къызэкIэлъэкIох, нахьыбэрэмкIэ градус 32 — 33-м анэсы, ашIокIэуи къыхэкIы, губгъо­хэм машIом закъыщиштэным ищынагъо нахьыбэ мэхъу. Ащ имызакъоу, гъэмафэм ошъури нахьыбэу къехы. Мыгъэ мары тигубгъохэм ащыщхэм машIо къащыхъугъ, ошъуми республикэр къыухьэрэп.

А зэпстэур къыдэлъыта­гъэу, лэжьыгъэм иIухыжьыгъом губгъохэм ошIэ-дэмышIэ Iоф къащымыхъуным лъы­плъэ­гъэ­ным фэгъэзэгъэ рабочэ куп Адыгеим щызэхащагъ. АР-м мэкъу-мэщымкIэ и Министерствэ тызэрэ­щи­гъэгъоза­гъэм­кIэ, ащ УФ-м и МЧС АР-мкIэ и ГъэIоры­шIапIэ, Россельхознадзорым Крас­нодар краимкIэ ыкIи АдыгеимкIэ и ГъэIорышIапIэ, «Россельхозцентрэм» икъутамэу АР-м щыIэм, ошъум пэшIуе­кIорэ къулыкъум ялIыкIохэр хагъэхьагъэх.

АР-м мэкъу-мэщымкIэ ими­нистрэу Владимир Свеженец тхьамэтагъор зыщызэрихьэгъэ зэхэсыгъоу ащ иIагъэм машIор къэмыхъуным фытегъэпсыхьагъэхэ шапхъэхэр шIокI имыIэу зэпстэуми агъэ­цэкIэнхэм, лэжьыгъэхэр ошъум щыухъумэгъэнхэм апае зэшIохыгъэнхэ фаехэм ащытегущыIагъэх. Мэкъу­огъум и 25-м къыщыублагъэу рабочэ купым муниципальнэ образованиехэр къыкIухьанхэу рахъухьагъ.

Зэрагъэнэфагъэу, тыгъуа­сэ, мэкъуогъум и 25-м Тэ­хъу­тэмыкъое ыкIи Теуцожь рай­онхэм, Адыгэкъалэ ащы­Iагъэх, непэ, и 26-м, къалэу Мыекъуапэрэ Мыекъопэ рай­онымрэ къакIухьэх, мэкъу­огъум и 27-м Джэджэ ыкIи Кощхьэблэ, и 28-м Шэу­джэн ыкIи Красногвардейскэ районхэм ащыIэщтых.