Шумэн Байзэт Адыгэ Республикэм и Апшъэрэ Хьыкум и Тхьаматэу агъэнэфагъ

Урысые Федерацием и Президент и УказкIэ Шумэн Байзэт Азмэт ыкъор Адыгэ Республикэм и Апшъэрэ Хьыкум и Тхьаматэу агъэнэфагъ. Зиполномочиехэм япIалъэ икIыгъэ Трэхъо Аслъан ары ащ ыпэкIэ мы IэнатIэм Iутыгъэр.

ЫпэкIэ Шумэн Байзэт Теуцожь район хьыкумым ипэщагъ. 1987-рэ илъэсым чъэпыогъум и 15-м къыщегъэжьагъэу а хьыкумым Iоф щишIагъ. 1991-рэ илъэсым тыгъэгъазэм и 19-м къыщыублагъэу Адыгэ Республикэм ипрокуратурэ икъулыкъухэм Iоф ащишIэу ригъэжьагъ. 1991-рэ илъэсым тыгъэгъазэм и 19-м къыщегъэжьагъэу 1994-рэ илъэсым мэзаем и 28-м нэс Шэуджэн район прокуратурэм ипрокурор иIэпыIэгъугъ, мы прокуратурэм иследователыгъ, 1994-рэ илъэсым мэзаем и 28-м къыщегъэжьагъэу 2000-рэ илъэсым чъэпыогъум и 4-м нэс Теуцожь район прокуратурэм ипрокурор иIэпыIэгъоу, иследователэу щытыгъ. 1992-рэ илъэсым Кубанскэ къэралыгъо универси­тетым июридическэ факультет къыухыгъ.

Адыгэ Республикэм и Къэралыгъо Совет – Хасэм 2000-рэ илъэсым чъэпыогъум и 3-м ышIыгъэ унашъом диштэу Адыгэкъалэрэ Теуцожь районымрэ яхьыкум участкэ изэгъэшIужь хьыкумышIэу агъэнэфагъ. 2003-рэ илъэсым чъэпыогъум и 31-м нэс а IэнатIэм Iутыгъ, 2004-рэ илъэсым шэкIогъум и 29-м нэс а чIыпIэ дэдэм зэгъэшIужь хьыкумышIым ипшъэрылъхэр щигъэцэкIагъэх. 2004-рэ илъэсым шэкIогъум и 18-м Теуцожь район хьыкумым ихьыкумышIэу агъэнэфагъ. 2008-рэ илъэсым тыгъэгъазэм и 10-м Адыгэ Республикэм ихьыкумышIхэм яквалификационнэ коллегие иунашъокIэ ящэнэрэ квалификационнэ классыр къы­фагъэшъошагъ. 2006-рэ илъэсым Адыгэ Республикэм и Апшъэрэ Хьыкумрэ Адыгэ Республикэм ихьыкум департамент и ГъэIорышIапIэрэ я Щытхъу тхылъ къыфагъэшъошагъ.