Шъолъыр зэнэкъокъум къыщыхагъэщыгъэх

«Илъэсым и Унагъу» зыфиIорэ шъолъыр зэнэкъокъур мы мафэхэм зэфахьысыжьыгъ. Ащ фэгъэхьыгъэ Iофтхьабзэу щыIагъэм хэлэжьагъ Адыгэ Республикэм и Премьер-министрэ игуадзэу Наталья Широковар.

Республикэм имуниципальнэ образованиехэм къарыкIыгъэ унэгъо 32-рэ ащ хэлэжьагъ. Видеокъэгъэлъэгъонэу къагъэ­хьазырыгъэхэмкIэ, общественнэ мэхьанэ зиIэ Iофтхьабзэхэм зэрахэлажьэхэрэмкIэ, нэмыкI лъэныкъо зэфэшъхьафхэмкIэ унагъохэр зэнэкъокъугъэх.

ЛъэныкъуитфыкIэ текIоныгъэр къыдэзыхыгъэхэр къыхагъэщыгъэх. Адыгеим къыщыхахыгъэ унагъохэр Урысые зэнэкъокъум иаужырэ едзыгъо хэлэжьэщтых.

Тэхъутэмыкъое районым щыщ зэшъхьэгъусэхэу Шэуджэн Ки­мэрэ Асиетрэ «Золотая семья России» зыфиIорэ лъэныкъомкIэ текIоныгъэ къыдахыгъ. Илъэс 52-рэ зэгъусэхэу ахэм зэда­гъэ­шIагъ. Ны-тыхэм кIэлитIу зэ­дапIугъ.

«Многодетная семья» зыфиIорэ лъэныкъомкIэ Олег ыкIи Анна Сидоровхэр къыхагъэщыгъэх. Ахэр Джэджэ районым щыщых. Зэшъхьэгъусэхэр илъэс 45-м ехъугъэу зэдэпсэух ыкIи сабыих зэдапIу.

«Унэгъо ныбжьыкI» зыфиIорэ лъэныкъомкIэ КIэмэщ Му­ратрэ Фатимэрэ текIоныгъэр афа­гъэшъошагъ. Зэшъхьэгъу­сэхэр Кощхьэблэ районым щы­щых. Илъэс 13-у зызэдэпсэу­хэрэм къыкIоцI сабыитIу зэдагъотыгъ.

«Сельская семья» зыфиIорэмкIэ Дачъэ Бислъанрэ Маринэрэ къахэщыгъэх. Ахэр Шэуджэн районым щэпсэух. Дачъэхэм илъэс 25-рэ хъугъэ унагъо зашIагъэр. А уахътэм къыкIоцI сабыиплI зэдагъотыгъ.

Красногвардейскэ районым щыщхэу Николай ыкIи Лариса Удаловхэм «Семья — хранитель традиций» зыфиIорэ лъэны­къомкIэ текIоныгъэ къыдахыгъ. Ахэм илъэс 44-рэ хъугъэ унагъо зашIагъэр, сабыищ зэдапIу.

— Мэхьанэ ин зиIэ зэнэ­къокъухэм мыр ащыщ, къыхэзгъэщы сшIоигъу зызэхащэрэм къыщегъэжьагъэу Адыгеир ащ зэрэхэлажьэрэр. Илъэс къэс лъэныкъо зэфэшъхьафхэмкIэ Урысыем къыщыхагъэщырэ унагъохэм тиреспубликэ икIыгъэхэр ащыщых. Щысэ зытепхын фаеу Адыгеим исыр макIэп, ащ къеушыхьаты унагъом иинститут гъэпытэгъэным фэIорышIэрэ Iофтхьабзэхэр чанэу тишъолъыр зэрэщагъэцакIэрэр. Лъэпкъ проектхэм къадыхэ­лъытагъэу мы лъэныкъомкIэ Iоф­шIэнхэр тапэкIи лъыдгъэ­кIотэщтых, — къыIуагъ Наталья Широковам.

УФ-м IофшIэнымкIэ ыкIи со­циальнэ ухъумэнымкIэ и Ми­нистерствэ щыIэныгъэм чIыпIэ къин ригъэуцогъэ сабыйхэм Iэ­пыIэгъу афэхъугъэнымкIэ Фон­дыр игъусэу «Семья года» зыфиIорэ зэнэкъокъум кIэщакIо фэхъугъэх. 2016-рэ илъэсым Iофтхьабзэр апэрэу зэхащагъ. Ащ текIоныгъэ къыщыдэзыхыгъэхэм Адыгеим икIыгъэхэри ахэфагъэх. Красногвардейскэ районым щыщ зэшъхьэгъусэхэу Михаил ыкIи Валентина Зайцевхэм «Сельская семья» зыфиIорэ лъэныкъомкIэ пстэуми къахэщыгъэх. 2017-рэ илъэсым Максим ыкIи Эльвира Раскоповхэми текIоныгъэ къахьыгъ. БлэкIыгъэ илъэсым «Унэгъо ныбжьыкI» зыфиIорэ лъэны­къом­кIэ Красногвардейскэ рай­оным щыщ зэшъхьэгъусэхэу Максим ыкIи Оксана Косенкэхэр къыхагъэщыгъэх. ЫпэкIэ зигугъу къэтшIыгъэ зэшъхьэгъу­сэхэм ящыIэныгъэ гъогу фэгъэ­хьыгъэр «Семья года. Россия» зыфиIорэ щытхъу тхылъым да­гъэхьагъ. ТекIоныгъэ къыдэзыхыгъэхэм зэкIэми якъэбархэр мы тхылъым дэтых.