Мэфэ зытIущ ныIэп къэнагъэр

Къихьащт мэкъуогъу мазэм и 3-м, ар къакIорэ блыпэ мафэр ары, цифрэ къэтыным Адыгеир техьэ.

Мэфэ заул ныIэп къэнагъэр нахьыпэкIэ тителевизорхэм къызэрагъэлъагъощтыгъэр, «аналог» ащ зэреджэхэрэр, пахынышъ, лъэхъаным къыздихьыгъэ шIыкIакIэр къыпагъэнэнкIэ. Мы илъэсыр къызихьагъэм къыщыублагъ ащ къэралыгъор игъорыгъоу зытехьэрэр, нэмыкI субъектхэм зыщапагъэнэгъахэ­хэр ахэтых. Джы мэкъуогъум и 3-м къэнэгъэ субъект 58-р те­хьащт, Адыгеири ахэм къахеубытэ.

Урысыем ителерадиовещание зегъэушъомбгъугъэным фытегъэпсыхьэгъэ федеральнэ программэу 2009 — 2018-рэ илъэс­хэм ателъытэгъагъэм диштэу цифрэ къэтыным икъэралыгъо сеть Адыгеим щагъэпсыгъ. Мы шIыкIакIэм тетэу къэтынхэр къэгъэлъэгъогъэнхэм пае станцие 15 агъэуцугъ. Ахэм яшIуагъэкIэ республикэм щыпсэу­хэрэм япроцент 99-м ехъумэ цифрэ шIыкIэр алъыIэсыщт.

Цифрэ къэтыныр телевизорхэм къаубытыным пае приставкэ гъэнэфагъэ апыбгъэнэ­нэу щыт. Ар 2012-рэ илъэсым ыпэкIэ къыдагъэкIыгъэ телевизорхэм якIущтэп, DVB-Т2 шапхъэр хэтын фае. Непэ къыдагъэкIырэ телевизорхэм а шапхъэр къащыдэлъытагъэшъ, ахэм зыпари апымыгъанэу цифрэ къэтынхэр къагъэлъэгъощтых. Приставкэхэм, гурытымкIэ лъы­тагъэу, сомэ мин ауасэр.

Цифрэ къэтын шIыкIэм тытехьэмэ ыпкIэ хэмылъэу канал 20-мэ тяплъын тлъэкIыщт, ма­къэ­хэри сурэтхэри зэхэугуфыкIыгъэщтых, Адыгэ къэралыгъо телерадиокомпанием икъэтынхэр зэкIэми къытлъыIэсыщтых. Спе­циалистхэм къызэраIорэмкIэ, приставкэр нахь лъапIэ къэс, къыгъэлъагъорэри нахьыбэщт.

Цифрэ шIыкIэм техьэгъэным икъу фэдизэу ыкIи игъом зыфэз­гъэхьазырыгъэ субъект анахь дэгъу 15-мэ Адыгеир ащыщ хъугъэ. Нэжъ-Iужъэу мы шIыкIэм шапхъэу пылъхэр икъу фэдизэу къызгурымыIохэрэм ахэр алъы­гъэIэсыгъэнхэм, приставкэр пы­гъэуцогъэнымкIэ IэпыIэгъу афэхъугъэным республикэм лъэшэу щыпылъых, социальнэ IофышIэхэмрэ волонтерхэмрэ ащ къыхагъэлажьэх. Ащ пае волонтер 700-м ехъу агъэхьазырыгъ.

Джащ фэдэу зигъот макIэу, телевизорыкIэ е приставкэ ыщэфын амал зимыIэхэм республикэм IэпыIэгъу щагъоты. АР-м и Премьер-министрэу Александр Наролиным къызэриIуагъэмкIэ, ащ сомэ мин 700-м ехъу пэIуагъэхьанэу агъэ­нэфагъ, зэкIэмкIи нэбгырэ 1350-мэ яшIуагъэ арагъэкIыщт.

Цифрэ шIыкIэм фытегъэ­псыхьэгъэ оборудованиехэмкIи республикэм зыпари гумэкIыгъо илъэп. Складхэм ащ фэдэ пкъы­гъо мини 5-м ехъу ачIэлъ, Уры­сыем и Почтэ икъутамэхэм ми­ни 2-м ехъу аIэкIэлъ.

ХЪУТ Нэфсэт.