ТызэлъыкIозэ нахьышIоу тызэрэшIэ

Адыгэ Республикэм и Къэралыгъо академическэ къэшъокIо ансамблэу «Налмэсым» иконцертхэр зэрэзэхищэхэрэм фэгъэхьыгъэу художественнэ пащэу Хъоджэе Аслъан гущыIэгъу тыфэхъугъ.

— Абхъазым тызэрэщыIагъэм шъущыгъуаз, — къытиIуагъ Хъо­джэе Аслъан. — Ткуарчал, Сы­хъум, Очамчири, Гудаутэ тип­чыхьэзэхахьэхэр ащыкIуагъэх.

— Къэлэ ЛIыхъужъэу Ткуарчал шъузэрэщыIагъэр нахь къахэбгъэщы сшIоигъу.

— Ткуарчал имэфэкI тефэу къалэм шIушIэ концертыр къыщыттыгъ. Пчыхьэзэхахьэу культурэм и Унэшхо щызэхащагъэм ыпкIэ амытэу еплъыгъэх. Iэгутео­шхокIэ тыкъызэра­гъэкIотэжьыгъэр егъа­шIи тщыгъупшэщтэп.

— Абхъазым щыщ­хэм къытфаIотагъ зэхахьэм укъы­зэрэщыгущыIагъэр.

— Абхъазхэр тэ, адыгэхэм, тилъэп­къэгъух. Зы лъэп­къэу тызэрэщытыр, Грузием идзэхэм Абхъазым зао къызырашIылIэм адыгэхэр зэкIэми апэу республикэм зэрэкъоуцуагъэхэр, Абхъазыр шъхьафит шIыжьыгъэным зэрэфэбэнагъэхэр, зэо-машIом зэкъош республикэхэм язэфыщытыкIэхэр зэрэщыпытагъэхэр, мамыр псэукIэм зызэриушъомбгъурэр къэсIотагъэх. Республикэхэм япащэхэр зэрэ­зэ­лъыкIохэрэм тегъэгушхо. Адыгеим и ЛIышъхьэу КъумпIыл Мурат Абхъазым джырэблагъэ зэрэщыIагъэм республикэм щытегущыIэх.

— ЩытхъуцIэу «Абхъазым изаслуженнэ артист» зыфиIорэр о къызэрэпфаусыгъэм фэшI тигъэзетеджэхэм ацIэкIи тыпфэгушIо.

— Лъэшэу сафэраз ащ фэдэ цIэ лъапIэр къызэрэсфагъэшъошагъэм фэшI.

— Концертхэр агу зэрэрихьыгъэхэр сэшIэшъ, хэушъхьафыкIыгъэу сакъыкIэупчIэрэп.

— Тилъэпкъ къашъохэр, аб­хъаз къашъохэр пчыхьэзэхахьэхэм къащытшIыгъэх. Искусствэм тызэрэзэфищэрэр тизэIукIэгъухэм къащылъэгъуагъ.

— Аслъан, тизэдэгущыIэгъу ехьылIэгъэ тхыгъэхэр къызыхэтыутыщт мафэм «Налмэсыр» Тыркуем щыIэщт. Сыда ащ къепIолIэщтыр?

— Ти ЛIышъхьэу КъумпIыл Мурат тихэбзэ къулыкъушIэхэр игъусэхэу Тыркуем щыIэщт. Дунаим щыцIэрыIо ансамблэу «Ислъамыери» Тыркуем кIощт. Адыгэ Республикэм икъэралыгъо гъэпсыкIэ зэрэпытэрэр, лъэпкъ искусствэм хэхъоныгъэ инхэр зэришIыхэрэм тагъэгушIо. Тыркуем тыкъикIыжьмэ тизэдэгущыIэгъу пытыублэжьынэу сыфай.

— Дэгъу. Тхьэм шIукIэ тызэIуегъэкIэжь.

ШъошIа, зэхэшъухыгъа?

«Налмэсыр» мэлылъфэгъум и 28-рэ пчэдыжьым Мыекъуапэ къэкIожьыщт. Пчыхьэм концерт тикъалэ къыщитыщт, мэлылъфэгъум и 29-м Коми иартистхэм ягъусэу Краснодар концертышхо щызэхащэщт.