Адыгэ кIалэр итхьамэтагъ

БлэкIыгъэ тхьамафэм «ГъомылэпхъэшI индустрием» ия III-рэ форум къалэу Красноярскэ щыкIуагъ. Ащ къыдыхэлъытэгъагъэх Сыбыр шъолъыр ихьалыгъугъажъэхэм яя XVI-рэ форум, хьалыгъугъажъэхэм яя VII-рэ чемпионат ыкIи «Пекарь Сибири» зыфиIорэ я XVI-рэ чемпионатыр. Форумым Германием, Италием, Китай, Нидерланды, Францием, Чехием, Австрием, Урысыем ыкIи нэмыкI къэралыгъуа­бэм къарыкIыгъэхэу гъомылэпхъэшIыным ыкIи перерабатывающэ промышленностым ащылажьэхэрэр, мы отраслэм пае оборудование къэзышIырэ компаниешхохэр хэлэжьагъэх.

Мэфищым кIогъэ Iофтхьабзэм хьаджыгъэм имызакъоу, лым, хэтэрыкIхэм, пхъэшъхьэ-мышъхьэхэм, нэмыкIыбэм гъомылэпхъэ зэфэшъхьафхэр зэрахэп­шIыкIыщт шIыкIэхэмкIэ щызэнэкъокъугъэх.

Красноярскэ краеу тиреспуб­ликэ пэчыжьэм икъэлэ шъхьаIэ щыкIогъэ Iофтхьабзэм игугъу къэтшIыным лъапсэ фэхъугъэр хьалыгъугъажъэхэм ячемпионатэу форумым къыдыхэлъытэгъагъэм ижюри адыгэ кIалэ зэритхьамэтагъэр ары.

ТичIыпIэгъоу НатIэкъо Заур Мыекъуапэ щызэлъашIэрэ хьалыгъугъэжъапIэу «Жак-Андрэ» зыфиIорэм ипащ, исэнэхьаткIэ пекарь-кондитер. Ар Францием щызэригъэгъотыгъ. АпэрапшIэу университетэу «Val-de-Marne» зыфиIорэм щеджагъ, ащ экономи­ческэ гъэсэныгъэ щызэригъэ­гъо­тыгъ. Ау ар хьалыгъугъэжъэ дэгъу ухъунымкIэ имыкъущтэу ылъыти, гастрономиемкIэ Францием иап­шъэрэ еджапIэу «Ferra­n­di» зыфиIорэм иеджэн щылъи­гъэкIотагъ. Ахэм ауж Париж ихьалыгъугъэ­жъэпIэ анахь цIэ­рыIохэм Iоф ащишIагъэу, ишIэны­гъэ къащигъэпытагъ нахь мышIэми, икъэлэ гупсэу Мыекъуапэ къыгъэзэжьи, ащ ибизнес щигъэ­псыгъ.

НатIэкъо Заур ыгъэпсыгъэ хьалыгъугъэжъэпIэ зэхэтыр къэ­лэдэсхэм, зэкI пIоми хэукъоныгъэ мыхъунэу, якIас, цIыфыбэ зэуалIэхэрэм ащыщ хъугъэ.

Заур гущыIэгъоу дытиIагъэм нахь кIасэу тигъэзетеджэхэр нэIуасэ фэтшIыщтых.

ХЪУТ Нэфсэт.

Сурэтым итхэр: чемпионатым хэлэжьагъэхэмрэ жюрим хэтыгъэхэмрэ. НатIэкъо Заур сэмэгумкIэ апэрэу щыт.