Республикэ законым зэхъокIыныгъэхэр фашIыгъэх

Адыгэ Республикэм и Законэу «Админист­­­ра­тивнэ хэбзэукъоныгъэхэм яхьылIагъ» зыфиIорэм цIыфхэм ярэхьатныгъэ къэу­хъу­­мэгъэнымкIэ шапхъэхэмрэ ахэр зыукъо­хэрэм пшъэдэкIыжьэу арагъэхьыщтымрэ щыгъэнэфагъэх. Ащ къызэрэщыдэлъытагъэмкIэ, чэщым сыхьатыр 23-м къыщегъэжьагъэу пчэды­жьым сыхьатыр 7-м нэс цIыфхэм ярэхьатныгъэ аукъо хъущтэп.

Адыгэ Республикэм и Къэралыгъо Совет — Хасэм идепутатхэм яIэгъэ зэхэсыгъом Адыгэ Республикэм и Законэу «Административнэ хэбзэукъоныгъэхэм яхьылIагъ» зыфиIорэм ия 22-рэ статья зэхъокIыны­гъэхэр щыфашIыгъэх. КъэIогъэн фае джы дин шапхъэхэм атетэу зэшIуахырэ дин фэIо-фашIэхэр ахэм къызэрахимыубытэжьхэрэр.

Шъугу къэтэгъэкIыжьы Адыгэ Республикэм и Законэу «Ад­министративнэ хэбзэукъоны­гъэхэм яхьылIагъ» зыфиIорэмкIэ цIыфхэм ярэхьатныгъэ зэраукъорэм епхыгъэ Iофы­гъохэр зэрагъэзекIохэрэр. Законым иа 1-рэ Iахь къы­зэ­рэ­щыдэлъыта­гъэмкIэ, сыхьатыр 23.00-м къы­щегъэжьагъэу сы­хьатыр 7.00-м нэс общественнэ рэхьатныгъэр зыукъохэрэм (мэкъэшхо къызыпыIукIырэ пкъыгъохэр транспортым, киоскхэм, павильонхэм, гъэмэфэ ресторанхэм, кафехэм, дискотекэхэм, балконхэм ащызыгъэфедэхэрэм, джащ фэдэу лъэшэу орэд къэзыIохэрэм е мэкъэмэ Iэ­мэ-псы­мэхэм къязыгъаIохэрэм) пщыныжь ара­гъэхьыщт. Ащ фэдэ админи­-ст­ративнэ хэбзэукъо­ныгъэ зы­шIырэ цIыфхэм сомэ 500-м къыщегъэжьагъэу мини 2-м нэс, IэнатIэ зыIыгъхэм — сомэ мини 2-м къыщегъэжьагъэу мини 5-м нэс, юридическэ лицэхэм — сомэ мин 15-м къыщегъэжьагъэу мин 30-м нэс тазырэу атыралъхьащт. Пщыныжь зытыралъхьагъэхэу илъэ­сым къыкIоцI джыри ащ фэдэ административнэ хэбзэукъо­ныгъэ зышIырэ цIыфхэм сомэ 500-м къыщегъэжьагъэу мини 2-м нэсэу, IэнатIэ зыIыгъхэм — сомэ мини 2-м къыщегъэжьагъэу мини 5-м нэсэу, юридическэ лицэхэм — сомэ мин 30-м къыщегъэжьагъэу мин 70-м нэсэу тазыр арагъэтыщт.