Адыгэ Республикэм и Конституционнэ Хьыкум къеты

Урысые Федерацием и Конституционнэ Хьыкум Урысые Федерацием IофшIэнымкIэ и Кодекс ия 178-рэ статья иа 1-рэ Iахь Урысые Федерацием и Конституцие димыштэу ылъытагъ.

Урысые Федерацием и Конституционнэ Хьыкум 2018-рэ илъэсым тыгъэгъазэм и 19-м ыштэгъэ унашъоу N 45-р зытетым ащ фэдэ зэфэхьысыжьым къыщыфэкIуагъэх. Урысые Федерацием IофшIэнымкIэ и Кодекс ия 178-рэ статья иа 1-рэ Iахь къызэрэщыдэлъытагъэмкIэ, организациер зэрэзэхагъэкIыжьырэм (Кодексым ия 81-рэ статья иа 1-рэ Iахь иа 1-рэ пункт) е организацием Iут нэбгырэ пчъагъэм къызэрэщагъакIэрэм (Кодексым ия 81-рэ статья иа 1-рэ Iахь ия 2-рэ пункт) епхыгъэу IофшIапIэм IуагъэкIыжьырэм зы мэзэ гурыт лэжьапкIэ фэдиз хъурэ ахъщэ IэпыIэгъу ратын ыкIи нэмыкI IофшIапIэ ащ къегъотыфэ нэс (ау мэзитIум къемыхъоу) гурыт мэзэ лэжьапкIэу иIагъэм фэдиз хъурэ ахъщи IукIэн фае.

М. В. Трофимовам Урысые Федерацием и Конституционнэ Хьыкум зыкъыз­кIыфигъэзагъэр Урысые Федерацием IофшIэнымкIэ и Кодекс иположениеу ыпшъэкIэ зигугъу къэтшIыгъэр Урысые Федерацием и Конституцие зэрэди­штэ­рэр ыуплъэкIунэу ары. Джыри зыныбжь илъэсрэ ныкъорэм нэмысыгъэ кIэлэцIыкIу зиIэ, ащ ифэIо-фашIэхэр зыгъэцэкIэрэ бзылъфыгъэр 2016-рэ илъэсым чъэпы­огъум и 12-м IофшIапIэм къыIуагъэкIы­жьыгъ организациер зэрэзэхагъэкIы­жьырэм ыпкъ къикIыкIэ. Урысые Фе­дерацием IофшIэнымкIэ и Кодекс ия 178-рэ статья диштэу гурыт мэзэ лэ­жьапкIэм фэдиз хъурэ ахъщэ IэпыIэгъу ащ къыратыгъ. Ау мэзитIум къыкIоцI нэмыкI IофшIапIэ Iумыхьэшъугъэ М. В. Трофимовам мэзитIу лэжьапкIэм фэдиз хъурэ ахъщэр къыIукIагъэп организациер зэрэзэхагъэкIыжьыгъэм ехьылIэгъэ къэбархэр юридическэ лицэхэм афэгъэ­хьыгъэ къэралыгъо реестрэ зыкIым ха­гъэхьагъэхэти.

Урысые Федерацием и Конституционнэ Хьыкум бзылъфыгъэм ифитыны­гъэхэр аукъуагъэхэу, зигугъу къэтшIыгъэ Кодексым иположениехэм ащыщхэр Урысые Федерацием и Конституцие димыштэхэу ылъытагъ. Ащ федеральнэ хэбзэгъэуцум игъо филъэгъугъ Iоф­шIэнымкIэ Кодексым зэхъокIыныгъэхэр фишIынхэу.

ЫпшъэкIэ зигугъу къэтшIыгъэ Ко­дексым зэхъокIыныгъэхэр фашIыфэ нэс организациер зэрэзэхагъэкIыжьырэм епхыгъэу IофшIапIэм къыIуагъэкIыжьхэрэм мы Кодексым ия 178-рэ статья ия 4-рэ Iахь къызэрэщыдэлъытэгъэ шIыкIэм диштэу ахъщэ IэпыIэгъум игъу­сэу нэмыкI IофшIапIэ IохьэфэхэкIэ гурыт лэжьапкIэу яIагъэм фэдиз ахъщэ къаратын е хэбзэгъэуцугъэм пэшIуемыкIорэ нэмыкI граждан-правовой амалхэр агъэфедэнхэ фае.

Адыгэ Республикэм и Консти­туционнэ Хьыкум исекретариат