Гуфаплъэу зышъуплъыхь!

Аужырэ уахътэхэм такси автомобилэу къалэм дэтхэм япчъагъэ зэхатшIэу хэхъуагъ. Ахэр зезыфэхэрэ водительхэм язытет лъэшэу щынагъо къэзытыхэрэм ащыщ.

Адыгеим и Къэралыгъо автоинспекцие къызэритыгъэмкIэ, мы илъэсым ешъуагъэу таксир зезыфэщтыгъэ нэбгыри 122-м ехъу республикэм ишъолъыр щатхыгъ. Гъогу-патруль къулыкъум иIофышIэхэм чэщ-зымафэм къыкIоцI таксисти 5 фэдиз ешъуагъэу къаубыты.

Статистикэм къызэригъэлъагъорэмкIэ, пшъэ­дэкIыжь зыми ыпашъхьэ зэрэщырямыIэр къаушыхьатызэ, нэмыкI цIыфхэми ящыIэныгъи къырамыдзэу зэпымыоу машинэр зезыфэ­хэрэр джыри ешъох. Зы хъугъэ-шIагъэ щысэу къэтхьын.

Къэлэрмэз екIурэ гъогум дэжь зы хъулъфыгъэ горэ укIорэизэ автомобилым итIысхьажьи ежьагъэу полицейскэхэм алъэгъугъ. Машинэр къыгъэуцунэу гъогу-патруль къулыкъум иэкипаж зэреджагъэр къыри­дзагъэп. Мыекъуапэ къыдэхьагъэу гъогу зэхэкIыпIэхэм ащыщ къыщагъэуцун алъэкIыгъ.

Медицинэ уплъэкIунхэу рашIылIагъэхэм къызэрагъэлъэгъуагъэмкIэ, зы промиллым ехъу илъ хэтыгъ. къызэрэчIэщыгъэмкIэ, мыщ ыпэкIи автомобилыр зэрифэнымкIэ фитыныгъэр Iахыгъэу щытыгъ джа ушъхьагъу дэдэмкIэ.

Адыгеим и Къэралыгъо автоинспекцие республикэм щыпсэухэрэ цIыфхэм зафегъазэ гулъытэ чан къызхагъэфэнэу ыкIи гъогурыкIоным хэлажьэхэрэм ящыIэныгъэкIэ щынагъо къэзытхэрэ водительхэм, ешъуагъэу рулым IутIысхьэхэрэм якъэбар полицием раIонэу. ГъогурыкIоныр щынэгъончъэнымкIэ Къэралыгъо автоинспекцием идежурнэ часть ителефон 53-90-02-рэ.