Анахь шъхьаIэхэм ащыщ

Ныгъом, кIэлэцIыкIугъом якъэухъумэн, сабый зэрыс унагъохэм Iэпы­Iэгъу ятыгъэныр республикэ пащэхэм анахьэу анаIэ зытыра­гъэты­хэ­рэм ащыщ.Ар къыщыхигъэщыгъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч джырэблагъэ мы къулыкъум зэфэхьысыжьхэр зыщишIыгъэ зэхэсыгъом къызыщэгущыIэм. Инфляциер зынэсыгъэу республикэ бюджетыр загъэнафэкIэ къыщыда­лъытэрэм диштэу кIэлэцIыкIухэм къаратырэ ахъщэ IэпыIэ­гъуми къыхэгъэхъогъэнэу блэ­кIыгъэ 2018-рэ илъэсым апэрэу ашIыгъ. Ащ проценти 3,8-рэ къыхэхъуагъэу а илъэс дэдэм имэзае и 1-м къыщыублагъэу къатынэу рагъэжьагъ, 2019-рэ илъэсым индексациер проценти 4,7-м нагъэсыгъ.

2018-рэ илъэсэу икIыгъэм кIэлэцIыкIухэм апае ахъщэ IэпыIэгъур мазэ къэс къызэратыгъэр нэбгырэ 9374-рэ мэхъу, сабыеу ар къызыфэкIуагъэр нэбгырэ 18365-рэ. Министрэм къызэриIуагъэмкIэ, республикэ бюджетым къыхэхыгъэу ахэм афатIупщыгъэр зэкIэмкIи сомэ миллион 43-рэ мин 678-рэ.

Сабый зэрысхэ унагъохэу IэпыIэгъу зищыкIагъэхэм аратын фэе ахъщэ тедзэ пстэури игъом ыкIи икъоу блэкIыгъэ илъэсым афатIупщыгъ. КIэлэцIыкIур къызэрэхъугъэм пае зэтыгъо ахъщэ тедзэ зыфэкIуа­гъэр нэбгырэ 2954-рэ, зэкIэмкIи зэхэтэу ащ пэIухьагъэр сомэ миллиони 5-м ехъу. Джащ фэдэу сэкъатныгъэ зиIэхэ кIэлэцIыкIухэм алъыплъэрэ нэбгыри 175-мэ мазэ къэс аратыгъэ ахъщэ тыным пстэумкIи сомэ мин 211-рэ пэIухьагъ.

Сабыибэ зэрысхэ унагъохэм коммунальнэ фэIо-фашIэхэм ауасэ итынкIэ ыкIи кIэлэцIыкIухэр ыпкIэ хэмылъэу общест­веннэ транспортым рызекIонхэмкIэ социальнэ IэпыIэгъу араты. Ахэр зэкIэмкIи унэгъо 4789-рэ мэхъух. БлэкIыгъэ илъэ­сым ащ фэдэ унагъохэм зэрадеIагъэхэм республикэ бюджетым къыхэхыгъэу сомэ миллион 80-рэ мин 877-рэ пэIухьагъ.

Ящэнэрэ ыкIи ащ къыкIэлъы­кIорэ сабыир къызэрэхъугъэм пае зэтыгъо ахъщэ тынэу сомэ мин 50 блэкIыгъэ илъэсым зэ­ратыгъэр нэбгырэ 887-рэ, зэ­кIэмкIи ахэм сомэ миллион 44-рэ мин 700-рэ афа­тIупщыгъ.

ХЪУТ Нэфсэт.