Исэнаущыгъэ осэшIу къыфашIыгъ маф

Модельер ныбжьыкIэу Пэрэныкъо Рузаннэ Москва щыкIогъэ зэнэкъокъоу «Moscow in­ter­national Fashion Fest» зыфиIорэм хэлэжьагъ ыкIи иIофшIагъэхэм осэшIу къыща­фашIыгъ. Ащ къызэрэтфиIотагъэмкIэ, фестивалым мыгъэ ежь апэрэу зыкъыщи­гъэлъэ­гъуагъ.

— Зэнэкъокъур модэм и Унэу Вя­чеслав Зайцевым ыцIэ зыхьырэм щыкIуагъ. Ащ Мыекъопэ къэралыгъо технологическэ университетым ыцIэкIэ сы­хэлэжьагъ, «CIRCASSIAN BRIDE» зыфиIорэ коллекциер къыщызгъэлъэ­гъуагъ, — къытфеIуатэ Рузаннэ.

«Быслъымэн» зыфиIорэ лъэныкъор ары Рузаннэ иIофшIагъэхэр къызщи­гъэлъэгъуагъэхэр. Ащ нысэ шъоши 7 зэнэкъокъум рихьылIагъ. Адыгэ лъэп­къым ижъырэ шъошэ дыкIэу иIагъэр къызыхэщырэ джанэхэм Iофтхьабзэм изэхэщакIохэм осэ ин къафашIыгъ. Ахэр ямышIыкIэу гъэпсыгъэх, дэхагъэмрэ укIытэ нэшанэмрэ зэгъусэхэу ахэолъа­гъо. ШэкI шъабэхэм гъучI тхыпхъэхэр ахэшIыхьагъэх. Пстэури зэкIужьэу зэ­рэшIыгъэр модельер цIэрыIохэм фестивалым къыщыхагъэщыгъ.

— Дэн-бзэным сицIыкIугъом къыщегъэжьагъэу сыфэщагъ, — къытфеIуатэ тигущыIэгъу. — Я 9-рэ классыр къэ­сыухы зэхъум сщыгъыгъэ джанэр сэр-сэрэу сыдыгъагъ. Сэнэхьатэу ар къыхэсхыным, сищыIэныгъэ еспхыным сегупшысэщтыгъэп. Дэныр сшIогъэшIэгъонэу сыпы­лъыгъ, нэужым ащ цIыкIу-цIыкIоу сызпищагъ. Джырэ уахътэ мы лъэныкъомкIэ сишIэныгъэхэм ахэсэгъахъо, Мые­къо­пэ къэралыгъо технологическэ уни­вер­си­тетым сыщеджэ.

Фестивалым ыуж Рузаннэ исэнаущыгъэ модэм и Унэ зэфэшъхьафхэм гу къылъатагъ. Нью-Йорк, Душанбе ащыкIощт Iофтхьабзэхэм ахэлэжьэнэу рагъэблэгъагъ.

Гъонэжьыкъо Сэтэнай.