«Экоцентрэм» къеты

Зэзэгъыныгъэм кIэтхэнхэ фае
Коммунальнэ пыдзэфэ пытэхэм узэра­дэзекIощтым фэгъэхьыгъэ хэбзэгъэуцугъэм къызэрэщыдэлъытагъэм­кIэ, ащ епхыгъэ фэIо-фашIэхэм ягъэцэ­кIэн фэгъэхьыгъэ зэзэгъыныгъэм кIэтхэн­хэр гъэсэныгъэм, псауныгъэм икъэухъу­мэн, культурэм, сатыум, нэмыкIхэм япхы­гъэ бюджет ыкIи коммерческэ организацие­хэмрэ предприятиехэмрэ япшъэрылъ.

Адыгеим Iоф щызышIэрэ юридическэ лицэхэмрэ унэе предпринимательхэмрэ хэкIым идэщын фэгъэхьыгъэ зэзэгъыныгъэм ООО-у «ЭкоЦентрэм» дыкIэтхэнхэ фае. МэзитIоу мы хъызмэтшIапIэм Iоф зишIэрэм къыкIоцI ар зыгъэцэкIагъэр 2500-рэ мэхъу. Ар зэкIэмкIи республикэм зыщязгъэтхыгъэм ипроцент 15 ныIэп.

Зэзэгъыныгъэм къыдыкIэмытхагъэхэм шъолъыр операторыр хэкIыр зыдэщыIэм щыгъозэщтэп, Iуищыщтэп. ХэкI Iумыщыгъэр зэтехъомэ, ащ зэрар къыхьыщт, къалэри къыгъэIэещт. ГухэкIми, тхылъым кIэтхэнхэм ычIыпIэкIэ нахьыбэхэм хэкIэу ашIырэр цIыфхэм хэкIитэкъупIэу афагъэ­псыгъэхэм аращалIэ.

Зэзэгъыныгъэм укIэтхэным пылъ шапхъэхэр мы телефонхэмкIэ шъутеомэ къышъуаIощт: 8.800-707-05-08, 8(8772)21-06-00, 8.988-479-94-18. Шъолъыр операторым иадресыр: къалэу Мыекъуапэ, урамэу Пионерскэр, 297-рэ. Блыпэ — бэрэскэшхо мафэхэм сыхьатыр 8.00-м къы­щыублагъэу 17.00-нэс, шэмбэт мафэм сыхьатыр 9.00-м щегъэжьагъэу 15.00-м нэс ар зэIухыгъ, тхьаумэфэ мафэр зыгъэпсэфыгъу. Электроннэ адресыр: adg_ecocentr@clean-rf.ru.

Нахь пэIудзыгъэхэм апае

Шъолъыр операторым иофис шъхьаIэ ыкIи ащ икъутамэхэр зыдэтхэ къалэхэу Мыекъуапэ, Адыгэкъалэ ыкIи поселкэу Яблоновскэм апэIудзыгъэ къоджэ псэу­пIэхэм адэсхэм зэIукIэгъухэр адэзышIыщтхэ купхэр ООО-у «ЭкоЦентрэм» зэхищагъэх.

Гъэтхэпэ мазэр къызихьагъэм къыщы­ублагъэу ахэм Iоф ашIэ. Шъолъыр операто­рым испециалистхэм псэупIэхэр къа­кIу­хьа­щтых. Мыхэм юридическэ лицэхэми, унэе предпринимательхэми, цIыфэу адэс­хэми закъыфагъэзэн алъэ­кIыщт, упчIэ пстэуми джэуап аратыжьыным фэхьазырых.

— Мы уахътэм зэкIэри офис шъхьаIэр ары къызэуалIэрэр, — къыIуагъ «ЭкоЦентрэм» ипащэу Алыбэрд Налбый. — Ар тиIофышIэхэмкIи цIыфхэмкIи IэшIэхэп. Ащ фэшI псэупIэхэр къэзыкIухьащт купхэр зэхэтщагъэх. Ахэм лъэныкъуитIуми яIоф нахь къагъэпсынкIэщт, зэзэгъыныгъэхэм якIэтхэнкIи, нэбгырэ пчъагъэу унагъом исым итхынкIи, уасэу атыщтым икIэлъы­тыкIыжьынкIи, нэмыкI IофхэмкIи IэпыIэгъу афэхъущтых.

«ЭкоЦентрэм» испециалистхэр псэу­пIэхэм зыщащыIэщтхэ графикыр муници­­пальнэ образованиехэм яадминистрацие­хэм уащыкIэупIэмэ, къыуатыщт, СМИ-хэми къатыщт, шъолъыр операторым интернет нэкIубгъоу http//adygeya.clean-rf.ru зыфиIорэми щызэбгъэшIэн плъэ­кIыщт.