Шъор-шъорэу шъузэмыIэзэжь

Гриппыр ыкIи пэтхъу-Iутхъур нахьыбэу къызыщяутэкIырэ лъэхъан итыр. Арэу щытми, а уз­хэм агъэгумэкIэу медицинэ учреждениехэм къяуалIэхэрэм япчъагъэ эпидемиологическэ гъуна­п­къэм процент 58,4-кIэ нахь макI.

Специалистхэм зэралъытэ­рэмкIэ, ащкIэ зишIуагъэ къэ­кIуагъэр вакцинациер рес­публикэм ифэшъуашэм тетэу зэрэщырагъэкIокIыгъэр ары.

Арэу щытми, мы мафэхэм гриппыр е пэтхъу-Iутхъур къызэутэкIыгъэхэм ахэхъо. Щылэ мазэм ахэм япчъагъэ нэбгырэ 790-м нэсыгъ. Адыгэ Респуб­ликэм псауныгъэр къэухъу­мэгъэнымкIэ и Министерствэ къы­зэритырэмкIэ, сымэджэщхэм пIэкIорэу ачIэтхэм ахагъэ­хъуагъ, нэмыкI пэшIорыгъэшъ Iофтхьабзэхэри зэрахьагъэх.

Министерствэм испециалистхэм республикэм щыпсэухэрэм зафагъазэ ежь-ежьырэу зэмы­Iэзэжьхэу, мы зэпахырэ узхэм янэшанэхэр зэхашIагъэмэ, вра­чым дэжь кIонхэ зэрэфаер зы­щамыгъэгъупшэнэу. Джащыгъум нэмыкI узхэр ахэм къа­кIэ­лъымыкIоным нахь уицыхьэ те­лъыщт, ахэр къызэузыхэрэм япчъагъи нахь макIэ хъущт.

«Гриппымрэ пэтхъу-Iут­хъумрэ анахь къин къызщы­хъухэрэр кIэлэцIыкIухэмрэ нэжъ-Iужъхэу уз гъэтIы­лъыгъэ зиIэхэу зииммуннэ системэ зэщыкъуагъэхэмрэ. Арышъ, мыхэм нахь шъуа­фэсакъын, а узхэм янэшанэхэм гуцаф афэшъушIыгъэмэ, охътэ лые тешъумыгъашIэу IэзапIэу шъузэпхыгъэм шъуе­кIуалI, ищыкIэгъэ Iэзэн Iоф­тхьабзэхэр игъом ежъугъэ­жьэным фэшI» — щыхагъэу­нэфыкIы Адыгэ Республикэм псауныгъэр къэухъумэгъэнымкIэ и Министерствэ.