Хымэ лыуз мыхъунэу

Мыекъуапэ игупчэ зыгъэпсэфыпIэ Iофтхьабзэу «IэпыIэгъу тызэфэ­гъэхъу» зыфиIорэр тыгъуасэ щыкIуагъ. Адэбзым ебэныгъэным и Ду­нэе мафэ ар фэгъэхьыгъагъ.

«Сэкъатныгъэ зиIэхэм я Уры­сые обществэ» Iофтхьабзэм кIэщакIо фэхъугъ, ащ иIэпы­Iэгъугъэх АР-м псауныгъэр къэухъумэгъэнымкIэ, шIэны­гъэмрэ гъэсэныгъэмрэкIэ иминистерствэхэр, Мыекъуапэ иадминистрацие. Джащ фэдэу ащ хэлэжьагъэх адэбз уз зиIэ бзылъфыгъэхэм язэдэIэпыIэжь купэу «Гум къикIэу гум факIоу» зыфиIорэр, медицинэм иIофышIэ волонтерхэр.

ШIушIэ концертрэ социальнэ флешмобрэ Iофтхьабзэм къыхиубытэу зэхащагъэх. Пшъэрылъ шъхьаIэу щытыгъэр адэ­­бзым ыгъэгумэкIырэ цIыфхэм якъиныгъохэм обществэм ынаIэ атырягъэдзэгъэныр ары.

ЦIыфхэу зигугъу тшIырэ гу­мэкIыгъор къызфыкъокIыгъэхэр пстэуми зэрафэдэхэм, ахэм шъхьэкIэфэныгъэрэ гуфэбэныгъэрэ зэрящыкIагъэм инэпэеплъ шархэу сиренышъо зиIэхэр Iофтхьабзэм хэлэжьагъэхэм ошъогум датIупщэягъэх, къэлэ паркым къыщыублагъэу Лениным ыцIэ зыхьырэ гупчэм нэс зэхэтхэу къыры­кIуагъэх.