ПсыкIэгъэхъоным иIофыгъохэр

УФ-м мэкъу-мэщымкIэ и Министерствэ мелиорациемкIэ и Департамент ипащэу Валерий Жуковыр тыгъуасэ Адыгеим къэкIогъагъ.

Мелиорацием епхыгъэ объектхэу республикэм итхэм язытет, мэкъумэщ хъызмэтым ичIыгухэм псыр акIэгъэхъо­гъэнымкIэ зэшIохыгъэ хъугъэхэм, Iофыгъохэу джыри щыIэхэм, нэмыкIхэм зыщатегущыIэгъэхэ зэхэсыгъо ащ Красногвардейскэ районым щызэхищэгъагъ. Ар рагъэжьэным ыпэкIэ АР-м мэкъу­мэщымкIэ иминистрэу Владимир Свеженецрэ «ГъэIорышIапIэу «Адыгеямелиоводхоз» зыфиIорэм ипащэу Хьэпэе Азаматрэ игъусэхэу мы муниципальнэ образованием итхэ насос станциехэм ащыIагъ. Зыр, N-2-р, федеральнэ программэм къыдыхэлъытагъэу 2016-рэ илъэсым агъэцэкIэжьи атIупщыжьыгъ, ау ятIонэрэ станцием, N 7-м, 1970-рэ илъэсхэм къащыублагъэу зыпари ра­шIылIагъэп. Ащ мэкъумэщ хъызмэтшIапIэу «Хьатикъуай» зыфиIорэм ипындж хьасэхэм псыр акIегъахъо, ау гъэцэ­кIэжьынхэр шIокI имыIэу ищыкIагъэхэ хъугъэ.

Валерий Жуковым насос станцием игъэцэкIэжьын тхылъхэу ищыкIагъэхэр къагъэхьазырхэмэ, 2020-рэ илъэсым ащ фэдэ Iофхэм апае федеральнэ ахъщэ зыфэкIощтхэм ахигъэфэщтэу къариIуагъ.

Нэужыми зэхэсыгъом мыщ фэдэ псэуалъэхэу Адыгеим инэмыкI чIыпIэхэм арытхэм ягъэцэкIэжьыни, псыкIэгъэхъо­ным нахь зегъэушъомбгъугъэным пае чIыгулэжьхэм IэпыIэгъоу къаратыщтхэми, нэмыкI лъэныкъохэми щатегущыIагъэх. Ахэр нахь игъэкIотыгъэу тигъэзет къыхиутыщтых.

ХЪУТ Нэфсэт.