Къуаджэхэм ясоциальнэ инфраструктурэ изегъэушъомбгъун Адыгеим щылъагъэкIотэщт

Программэ гуадзэу «Зыпкъ итэу къуаджэхэм хэхъоныгъэ ягъэшIыгъэныр» зыфиIорэм къыдыхэлъытагъэу инженер, социальнэ инфраструктурэм изегъэушъомбгъун мыгъэ Адыгеим щылъагъэкIотэщт.

ГущыIэм пае, къоджэдэсхэм щыIэ­кIэ-псэукIэ амалэу яIэр нахьышIу шIыгъэным сомэ миллион 28,8-рэ пэIуа­гъэхьащт. Унэгъо ныбжьыкIэхэу, специалист ныбжьыкIэхэу къуаджэхэм адэсхэм апае квадрат метрэ 1400-рэ хъурэ унэхэр агъэпсынэу е къащэфынэу ра­хъухьэ.

Шэуджэн районымкIэ къутырэу Тихоновым квадрат метрэ мини 4,3-рэ хъурэ физкультурэ-спорт паркым ишIын щаухыщт. ПстэумкIи проектым сомэ миллиони 8,9-рэ тефэщт.

Джащ фэдэу Теуцожь районымкIэ къуаджэу Нэшъукъуае фельдшер-мамыку пункт щагъэпсынэу рахъухьэ. Ащ пае бюджетхэм сомэ миллиони 4,9-рэ къахагъэкIыщт. Программэ гуадзэр за­гъэцакIэрэм къыщегъэжьагъэу (2012 – 2018-рэ илъэсхэм) фельдшер-мамыку пункти 8 Адыгеим щагъэпсыгъ.

Къоджэдэсхэм яшIоигъоныгъэхэр афэгъэцэкIэгъэнхэм, ахэм грант IэпыIэгъу ягъэгъотыгъэным атегъэпсыхьагъэу Кощхьэблэ районымкIэ къуаджэу Еджэркъуае зыгъэпсэфыпIэ чIыпIэрэ кIэлэцIыкIу джэгупIэрэ щагъэпсынхэу щыт. А гухэлъхэм апае бюджетхэм сомэ мин 970-рэ къахагъэкIыщт. Рес­публикэм имуниципальнэ образование мыщ фэдэ Iофтхьабзэм зыхэлажьэрэр апэрэ.

Шъугу къэтэгъэкIыжьы зыпкъ итэу къуаджэхэм хэхъоныгъэ ягъэшIыгъэным тегъэпсыхьэгъэ программэм диштэу 2019-рэ илъэсым федеральнэ, шъолъыр бюджетхэм къоджэ гъогухэм ягъэкIэжьын пае сомэ миллиони 121,4-рэ, газрыкIуа­пIэхэм яшIын пае сомэ миллион 14,6-рэ, псырыкIуапIэхэм ягъэпсын пае сомэ милллион 28-рэ фэдиз къазэрахагъэкIыщтыр.