АР-м иминистрэхэм я Кабинет зичэзыу IофшIэгъу зэхэсыгъоу мы мафэхэм иIагъэм Адыгэ Республикэм и ЛIышъхьэу КъумпIыл Мурат къыщыгущыIэзэ, псэупIэхэм яшIын епхыгъэ IофшIэныр шъолъырым щыгъэлъэшыгъэн зэрэфаер къыIуагъ.
ПсэупIэхэм яшIынкIэ республикэм щызэшIуахырэм, IофшIэныр зэхэщагъэ зэрэхъу-
рэм къатегущыIагъ Адыгеим и Премьер-министрэ игуадзэу Сапый Вячеслав. Ащ къызэриIуагъэмкIэ, 2019-рэ илъэсымкIэ гухэлъэу щыIэр республикэм псэупIэ квадратнэ метрэ мин 270-м ехъу щышIыгъэныр ары. А планыр муниципалитетхэм атырагощагъ ыкIи илъэсым ыкIэм нэс къэгъэлъэгъон гъэнэфагъэхэм анэсынхэ фае.
Мы лъэныкъомкIэ гухэлъхэу щыIэхэр гъэцэкIэгъэнхэм фэшI фэтэрыбэу зэхэтхэу унэхэр зышIыхэрэм хэбзэ къулыкъухэр IэпыIэгъу афэхъунхэ, яшIуагъэ арагъэкIын зэрэфаер АР-м и ЛIышъхьэ къыхигъэщыгъ.
— Республикэм икъалэхэм ыкIи ирайонхэм зэкIэми фэтэрыбэу зэхэт унэхэр зытырашIыхьанхэ алъэкIыщтхэ площадкэ хьазырхэр яIэнхэ фае. ПсэупIэхэм яшIын ыкIи инфраструктурэм зэрэхэхьащтхэм епхыгъэ тхылъхэр ятыгъэнхэр Адыгеим щызэхэщагъэ зэрэхъурэм АР-м архитектурэмрэ къэлэгъэпсынымрэкIэ и Комитет лъыплъэнэу пшъэрылъ фэсэшIы, — къыIуагъ КъумпIыл Мурат.
ТХЬАРКЪОХЪО Адам.