Сэкъатныгъэ зиIэхэ кIэлэцIыкIухэм ятворчествэ къызщагъэлъэгъорэ республикэ фестивалэу «Шаг навстречу!» зыфиIорэм иапэрэ (хэшыпыкIын) едзыгъо районхэм ащырагъэжьагъ. 
ЦIыфхэм социальнэ фэIо-фашIэхэр афэгъэцэкIэгъэнхэмкIэ комплекснэ гупчэхэу районхэм ащыIэхэм яIофышIэхэм ар рагъэкIокIы.
Хабзэ зэрэхъугъэу, илъэс къэс мы Iофтхьабзэр Адыгэ Республикэм IофшIэнымкIэ
ыкIи социальнэ хэхъоныгъэхэмкIэ и Министерствэ зэхещэ. Ащ имурадыр зипсауныгъэ зэщыкъогъэхэ кIэлэцIыкIухэм ятворческэ амалхэр къагъэлъэгъонхэр, джырэ щыIакIэм зыкъыхагъотэнымкIэ IэпыIэгъу афэхъугъэныр ары.
Мы фестивалым хэлажьэхэрэм мэфэкI шъыпкъэу ар алъытэ. Илъэси 7-м къыщегъэжьагъэу илъэс 18-м нэс зыныбжь нэбгыри 100-м ехъу мыщ къекIуалIэ. ЛъэныкъуиплIыкIэ зыкъагъэлъэгъон алъэкIы: орэдыIоныр, музыкальнэ Iэмэ-псымэхэм къягъэIогъэныр, къэшъоныр, Iэпэщысэхэм яшIын.
ТекIоныгъэ къыдэзыххэрэми хэлажьэхэрэми щытхъу тхылъхэмрэ нэпэеплъ шIухьафтынхэмрэ аратых.
ХэшыпыкIын едзыгъом къащыхэщыщтхэр ары республикэ зэнэкъокъум хэлэжьэщтхэр. Фестивалэу «Шаг навстречу!» зыфиIорэр чъэпыогъум и 31-м Адыгэ Республикэм и Къэралыгъо филармоние щыкIощт.