«Динамо-МГТУ»-р къахэщы

Краснодар краим волейболымкIэ и Кубок къыдэхыгъэным хэлажьэхэрэ студент командэхэу финалым и 1/4-м нэсыгъэхэр Адыгэ Республикэм испорт Унэшхоу «Ошъутенэм» щызэдешIагъэх. Лабинскэ, Краснодар, Мыекъуапэ, нэмыкIхэм яхъулъфыгъэ ешIакIохэр текIоныгъэм фэбэнагъэх.

Мыекъуапэ икомандэу «Динамо-МГТУ»-р Краснодар къикIыгъэхэм адешIагъ. Едзыгъуищыри 25:18-у Адыгеим щыщхэм къахьыгъ.

— Едзыгъуищыми япчъагъэ зэрэзэфэдэр бгъэшIэгъонэу щыт, — къытиIуагъ зэнэкъокъум исудья шъхьаIэу Григорий Торосовым. — «Динамо-МГТУ»-р иIэпэIэсэныгъэкIэ къахэщыгъ. Студентхэм нахь зыкъызэIуахынымкIэ, япсауныгъэ агъэпытэнымкIэ ащ фэдэ зэIукIэгъухэр ящыкIагъэх.

— Лабинскэ, Новотиторовскэ, Брюховецкэ, Мыекъуапэ яволейбол командэхэр финалныкъом щызэIукIэщтых, — къеIуатэ «Динамо-МГТУ»-м итренер шъхьаIэу, Адыгэ Республикэм изаслуженнэ тренерэу Павел Зборовскэм. — Новотиторовскэм иешIакIохэм зэIукIэгъур къашIотхьымэ апэрэ чIыпIэм тыфэбэнэщт.

Мэлылъфэгъум и 14 — 15-м кIэух ешIэгъухэр Краснодар краим ипсэупIэу Медведовскэм щыкIощтых.

Сурэтым итхэр: Мыекъуапэ икомандэ Краснодар къикIыгъэхэм адешIэ.

ЕМТIЫЛЪ Нурбый