КIэлэцIыкIу IыгъыпIэхэр зэтырагъэпсыхьэх

Урысые Федерацием и Президент иIэпэчIэгъэнэ фонд къыхэхыгъэ мылъкум ишIуагъэкIэ Адыгеим ит псэолъэ заулэмэ игъэкIотыгъэ гъэцэкIэжьынхэр ащэкIох. АщкIэ пшъэрылъхэр зэшIохыгъэхэ зэрэхъурэм Адыгэ Республикэм и ЛIышъхьэу КъумпIыл Мурат ынаIэ тет, IофшIэнхэр зэрэлъыкIуатэхэрэм зыщегъэгъуазэ.

Социальнэ объектхэр зэрифэшъуашэу зэтегъэпсыхьэгъэнхэм (анахьэу сабыйхэр зыщаIыгъ гъэсэныгъэм иучреждениехэр), ахэм ящыкIэгъэ оборудованиер ягъэгъотыгъэным мэхьанэшхо зэриIэр Адыгеим и ЛIышъхьэ ипсалъэ мызэу, мытIоу къыщыхигъэщыгъ. КIэлэцIыкIу IыгъыпIэхэр пштэмэ, илъэси 3 — 7 зыныбжь сабыйхэм алъэныкъокIэ непэ чэзыу щыIэжьэп, илъэси 3-м нэс зыныбжьхэм яфэIо-фашIэхэр афэгъэцэкIэгъэнхэм, ахэм зэкIэми чIыпIэхэр яIэнхэм республикэм ипащэхэр джырэ уахътэм дэлажьэх.

УФ-м и Президент иIэпэчIэгъэнэ фонд къыхэхыгъэ мылъкумкIэ зэтырагъэпсыхьажьы Мыекъопэ районым ит къутырэу Северо-Восточные Сады дэт кIэлэцIыкIу IыгъыпIэу «Золотая рыбка» зыфиIорэр. Адыгэ Республикэм и ЛIышъхьэу КъумпIыл Мурат бэмышIэу ащ щыIагъ, псэолъэшI IофшIэнхэр зэрэлъыкIуатэхэрэм зыщигъэгъозагъ. ЫпшъэкIэ къызэрэщытIуагъэу, къэралыгъом ипащэ иIэпэчIэгъэнэ фонд къыхэхыгъэ сомэ миллион 51,5-м ехъу мы учреждением изэтегъэпсыхьан пэIуагъэхьащт. Мылъкур блэкIыгъэ илъэсым ыкIэм республикэм къыIэкIэхьагъ.

Мы гъэсэныгъэм иучреждение 1987-рэ илъэсым къыщегъэжьагъэу 1999-рэ илъэсым нэс Iоф ышIагъ, сабыйхэр бэу мыщ къакIощтыгъэх. Шапхъэхэм зэрадимыштэжьырэм къыхэкIыкIэ ар нэужым зэфашIыгъ.

КIэлэцIыкIу IыгъыпIэм ипащэу Ирина Болховитинам къызэриIуагъэмкIэ, джырэ уахътэм сабыйхэр Мыекъуапэ дэт кIэлэцIыкIу IыгъыпIэхэм ащэх, ау гъэцэкIэжьынхэр заухырэ нэуж сабыи 110-мэ мыщ чIыпIэхэр щагъотыщтых. Ежь имызакъоу, псэупIэм дэсхэри а мафэм ежэх.

— Къутырым дэсхэр зэкIэ кIэлэцIыкIу IыгъыпIэр къызэIуахыжьыным ежэх, — еIо Ирина Болховитинам. — Мыщ къыпыщылъ чIыгур гъэкъэбзэгъэнымкIэ ны-ты ныбжьыкIэхэр, къутырдэсхэр IэпыIэгъу къытфэхъугъэх.

КIэлэцIыкIу IыгъыпIэм квадратнэ метрэ 1068,2-рэ илъ, чIыгу квадратнэ метрэ 8300-рэ къыпыщылъ. Илъэсэу тызхэтым ищылэ мазэ и 29-м щегъэжьагъэу псэолъэшI IофшIэнхэр мыщ щэкIох, джырэ уахътэм унашъхьэр зыIыгъыщт пкъыгъохэм язэхэгъэуцон псэолъэшIхэр дэлажьэх. Ащ дакIоу джэхашъохэр икIэрыкIэу радзэжьыщтых, пчъэхэр, шъхьангъупчъэхэр хагъэуцожьыщтых, мебелыкIэ чIагъэуцощт, нэмыкI IофшIэнэу къапыщылъыр макIэп, кIэлэцIыкIу IыгъыпIэр икIэрыкIэу ашIыжьыщт пIоми ухэукъощтэп. 2018-рэ илъэсым бэдзэогъум и 31-м нэс псэуалъэр атынэу агъэнафэ. IофшIэнхэр зыгъэцакIэрэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Марк-Сервисыр» ары.

Мыекъуапэ дэт кIэлэцIыкIу IыгъыпIэу «Звоночек» зыфиIорэри непэ зэтырагъэпсыхьэ. Мыщ 1968-рэ илъэсым щыублагъэу Iоф ешIэ, нэбгыри 140-мэ ателъытагъ. Илъэс пчъагъэхэм къакIоцI псэуалъэм игъэкIотыгъэ гъэцэкIэжьынхэр зэрэщымыкIуагъэхэм къыхэкIыкIэ изытет шапхъэхэм адимыштэжь хъугъэ. ЗэрагъэнэфагъэмкIэ, ащ изэтегъэпсыхьан УФ-м и Президент иIэпэчIэгъэнэ фонд къыхэхыгъэ сомэ миллион 14,2-м ехъу пэIуагъэхьащт. Унашъхьэр ыкIи дэпкъхэр, псырыкIуапIэхэр ыкIи канализациер агъэцэкIэжьыщтых, электричествэр зэрыкIорэ линиехэр зэблахъущтых, нэмыкI IофшIэнхэри къыдыхэлъытагъэх. Непэ ехъулIэу дэпкъхэр зэфащагъэх, штукатуркэ ашIыгъэх, хэкIыр дащыгъ.

ПсэолъэшI IофшIэнхэр зыгъэцакIэрэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Стройгазсервисыр» ары. ЗэрагъэнэфагъэмкIэ, 2018-рэ илъэсым мэкъуогъум и 30-м нэс кIэлэцIыкIу IыгъыпIэр къызэIуахыжьыщт. КIэлэцIыкIу IыгъыпIэр зэрагъэцэкIэжьыщтым дакIоу ащ къыпыщылъ чIыпIэхэри зэтегъэпсыхьэгъэнхэм мэхьанэшхо зэриIэр АР-м и ЛIышъхьэ къыIуагъ, ащкIэ АР-м гъэсэныгъэмрэ шIэныгъэмрэкIэ иминистрэу КIэрэщэ Анзаур пшъэрылъ гъэнэфагъэ фишIыгъ.

— КIэлэцIыкIу IыгъыпIэхэр дгъэцэкIэжьхэзэ, ахэм амалэу аIэкIэлъхэм ахэтэгъахъо, илъэсищым нэс зыныбжь сабыйхэм чIыпIэхэр ягъэгъотыгъэнхэм игумэкIыгъо чэзыу-чэзыоу дэтэгъэзыжьы. Илъэси 3 — 7 зыныбжь кIэлэцIыкIухэм алъэныкъокIэ непэ чэзыу щыIэжьэп. Гъэмафэм ехъулIэу къутырэу Северо-Восточные Сады дэс унэгъо ныбжьыкIэхэм якIэлэцIыкIухэр шэпхъэшIухэм адиштэрэ гъэсэныгъэм иучреждение ащэнхэ амал яIэщт. ТшIэрэр зэкIэ зыфэгъэхьыгъэр тицIыфхэм апай, ахэм ящыIэкIэ-псэукIэ нахьышIу шIыгъэныр, яфэIо-фашIэхэр зэрифэшъуашэу афэдгъэцэкIэнхэр ары, — къыIуагъ КъумпIыл Мурат.

Республикэм ипащэ къызэрэхигъэщыгъэмкIэ, федеральнэ гупчэмрэ УФ-м и Президент иIэпэчIэгъэнэ фондрэ IэпыIэгъу къазэрафэхъухэрэм ишIуагъэкIэ социальнэ мэхьанэ зиIэ Iофыгъуабэхэр республикэм щызэшIуахых. Шъугу къэдгъэкIыжьын, къэралыгъом ипащэу Владимир Путиныр зыкIэтхэжьыгъэ унашъом диштэу тишъолъыр ит псауныгъэр къэухъумэгъэным, гъэсэныгъэм ыкIи культурэм иорганизацие заулэмэ мылъку къафатIупщыгъ. ЫпшъэкIэ зигугъу къэтшIыгъэ кIэлэцIыкIу IыгъыпIитIум анэмыкIэу медицинэм иучреждениищмэ ыкIи къуаджэхэм адэт культурэм иунитIумэ ягъэцэкIэжьын пэIуагъэхьащт сомэ миллион 70-рэ фэдиз Адыгеим къыIэкIэхьагъ. Мылъкур зэрагъэфедэрэм, гъэцэкIэжьын IофшIэнхэр зэрэлъыкIуатэхэрэм АР-м и ЛIышъхьэу КъумпIыл Мурат ынаIэ тет.

ТХЬАРКЪОХЪО Адам.

Сурэтыр А. Гусевым тырихыгъ.