Хэхъоныгъэхэм яилъэс пшIыкIутIу

ШIэныгъэмкIэ ыкIи научнэ политикэмкIэ Советэу АР-м и ЛIышъхьэ дэжь щызэхэщагъэм изэхэсыгъоу тыгъуасэ щыIагъэм 2030-рэ илъэсым нэс республикэм социальнэ-экономическэ хэхъоныгъэу ышIыщтхэм я Cтратегие щытегущыIагъэх. Iофтхьабзэм хэлэжьагъ Адыгэ Республикэм и ЛIышъхьэ.

Республикэм ипащэ пэублэм къызэриIуагъэмкIэ, шъолъырым ипрограммнэ документ шъхьаIэ — 2030-рэ илъэсым нэс Адыгеим социальнэ-экономикэ хэхъоныгъэу ышIыщтхэм я Стратегие — изэхэгъэуцон ыкIэм фэкIуагъ. Мы илъэсым ыкIэм нэс республикэм ыкIи къэралыгъом ишъолъырхэм зэкIэми федеральнэ хэбзэгъэуцугъэм диштэу агъэпсыгъэ стратегическэ ихъухьаным идокументхэр ащаштэнхэ фае. 2035-рэ илъэсым нэс Урысыем социальнэ-экономическэ хэхъоныгъэу ышIыщтхэм я Стратегие УФ-м и Правительствэ джырэблагъэ ыштэщт. Ащ къыдыхэлъытэгъэщтых къэралыгъом ишъолъырхэм хэхъоныгъэхэр ашIынхэмкIэ пшъэрылъ шъхьаIэу къэуцухэрэр, анахьэу анаIэ зытырагъэтыщт лъэныкъохэр.

— Стратегием изэхэгъэуцон общественностыр къыхэгъэлэжьэгъэным мэхьанэшхо иI, джащ фэдэу проектым тытегущыIэ зыхъукIэ, бизнесым, гъэсэныгъэм ыкIи наукэм ялIыкIохэм тадэгущыIэным, тызэгъусэу лъэныкъо шъхьаIэхэр дгъэнэфэнхэм тынаIэ тетэгъэты, — къыIуагъ КъумпIыл Мурат. — Ащ фэдэ площадкэхэм зэу ащыщыгъ шъолъырым стратегическэ хэхъоныгъэхэр ышIынхэмкIэ мэхьанэшхо зыщыратыгъэ инвестиционнэ форумэу «Invest in Adygea» зыфиIорэр. Форумым хэлэжьагъэхэм республикэм ишIэныгъэлэжьхэри ахэтыгъэх. Мыщ дэжьым къыщыхэзгъэщынэу сыфай шъолъырым инаучнэ сообществэ лъэныкъо пстэуми еплъыкIэу афыриIэм мэхьанэшхо зэреттырэр.

Стратегием ипроект зэхагъэуцо зыхъукIэ ыпшъэкIэ зигугъу къэтшIыгъэ Советым хэтхэм яеплъыкIэхэр ыкIи предложениеу къахьыгъэхэр къыдыхэлъытэгъэнхэ фаеу АР-м и ЛIышъхьэ ылъытагъ ыкIи ащкIэ Адыгеим экономикэ хэхъоныгъэмкIэ ыкIи сатыумкIэ и Министерствэ пшъэрылъ гъэнэфагъэ фишIыгъ.

Республикэм социальнэ-экономкэ хэхъоныгъэхэр ышIынхэм фытегъэпсыхьэгъэ «Живая стратегия «Адыгея-2030» зыфиIорэм къыдыхэлъытэгъэ лъэныкъо шъхьаIэхэм, пшъэрылъхэм къатегущыIагъэх Леонтьевскэ гупчэм и Консорциумэу — AV Group-м игъэIорышIэкIо пащэу Алексей Крыловскэр, Мыекъопэ къэралыгъо технологическэ университетым иректорэу Къуижъ Саидэ, нэмыкIхэри. КъызэраIуагъэмкIэ, мэзаем Стратегием ылъэныкъокIэ щыIэ Iофыгъохэр зэкIэ зэшIохыгъэнхэ ыкIи документыр федеральнэ гупчэм IэкIэгъэхьэгъэн фае. Нэужым ар хэбзэгъэуцугъэ хъущт.

2018-рэ илъэсым Советым Iоф зэришIэщтым иплан зэхэсыгъом щаштагъ.

ТХЬАРКЪОХЪО Адам.