Уасэхэр, еплъыкIэхэр

Мэзэ заулэкIэ узэкIэIэбэжьмэ, апэрэу Урысыем мыгъомылэпхъэ товархэм, щыгъыным, лъэкъопылъхьэм къащегъэжьагъэу бензиным нэсэу, ауасэхэм зыкъызэраIэтырэм ипсынкIагъэ хахъоу ригъэжьагъ. Ау гъомылапхъэхэм ауасэ къыщыкIагъ.

Ар къеушыхьаты Гупчэ банкым мазэ къэс зэхищэрэ уплъэкIунэу «О чем говорят тренды» зыфиIорэм. 2018-рэ илъэсым имэзэ 11-у пыкIыгъэм изэфэхьысыжьхэр аналитикхэм ашIыгъэх.

Илъэсыр екIыфэ сомэм кIуачIэу иIэм къыкIичыщтэп

Мыгъомылэпхъэ секторым ылъэныкъокIэ инфляциеу щыIэр къыдэплъытэмэ, шэкIогъу мазэм уасэм процент 0,23-кIэ зыкъиIэтыгъ, чъэпыогъум а пчъагъэр процент 0,15-рэ хъущтыгъэ. Ар джыри гъунэм нэсыгъэп. Сыда пIомэ, экспертхэм зэралъытэрэмкIэ, мыгъомылэпхъэ товархэу Урысыем къыщыдагъэкIыхэрэр IэкIыбым къыращыхэрэр зыфэдизым елъытыгъ. «Агъэфедэрэ бзыуцыфыр, кIапсэр ыкIи Iуданэр, джащ фэдэу цыр ыкIи леныр проценти 100-м кIахьэу шэкI отраслэм къыIэкIахьэх. Арышъ, продукцие хьазырыр къазэрафекIурэр долларым уасэу иIэм елъытыгъ», — еIо аналитическэ агентствэм ипащэу Анна Орзовам.

Мыщ дакIоу мыгъомылэпхъэ товархэм ауасэ зэрэхахъорэм ипсынкIагъэ зыпкъ ит. Джащ фэдэу инфляциер зылъыIэсыгъэхэм фэIо-фашIэхэри ащыщ. ШэкIогъу мазэм мы лъэныкъомкIэ мэкIэ-макIэу процент 0,33-рэ хэхъуагъ, чъэпыогъу мазэм ар процент 0,28-рэ хъущтыгъэ.

Мэзэ 12-м телъытагъэу шэкIогъу мазэм фэIо-фашIэхэм ауасэ къызэрэхэхъуагъэр зыпштэкIэ, илъэсым телъытагъэу инфляциер проценти 3,96-рэ мэхъу.

Товар къыдэзыгъэкIыхэрэ производствэхэм агъэфедэхэрэ энергокъэкIуапIэхэу чIыдагъэм, гъэстыныпхъэм къазэрэхэхъуагъэмкIэ, инфляцием зыкъиIэтыгъ. ЧIыдэгъэ продукцием уасэу иIэр бэкIэ нахьыб инфляцием нахьи. ЧIыдагъэм дунаим уасэу щыриIэм баррелыр доллар 60-м шIомыкIы хъумэ, гъэстыныпхъэм ыуасэ ыпэ итэу экономикэм текIодэгъэ пчъагъэм иягъэ къекIын ылъэкIыщт.

Нэшэбэгур, помидорыр, кIэнкIэр ыкIи пцэжъыер къэлъэпIагъэх

ЭнергокъэкIуапIэхэм ауасэ къызэрэхахъорэм елъытыгъ мэкъумэщ предприятиехэм атекIуадэрэри нахьыбэ зэрэхъурэр. Ащ къыхэкIэу япродукцие хагъэхъон фаеу мэхъу. ГущыIэм пае, энергокъэкIуапIэхэм ауасэ къыхэхъуагъэми, чэтылыр ыкIи къолыр къэзыхьыжьхэрэм япродукцие ыуасэ хагъэхъошъурэп щэфакIохэр зэрашIомыкIодыщтхэм пае.

Нахь гъэшIэгъоныр: уасэхэм къазэрэхахъорэм дакIоу инфляциер нахьыбэ хъунымкIэ щынагъо къэзытырэ нэмыкI лъэныкъохэри щыIэх. ГущыIэм пае, цIыфхэм федэу къаIэкIахьэрэм зэрэхахъорэр къыдагъэкIырэ продукцием ипчъагъэ емылъытыгъэу зыхъукIэ ары. Экспертхэм зэралъытэрэмкIэ, ащыгъум лэжьапкIэм къыхэхъоным гумэкIыгъо къыпыкIын ылъэкIыщт.

НэмыкI къэралыгъохэм инфляцием хэмыхъоным игумэкIыгъо нэмыкI шIыкIэкIэ дагъэзыжьыным пылъых, ащ пае цIыфхэм ахъщэ тедзэхэр аратых, ащ ишIуагъэкIэ IофшIэпIэ чIыпIэхэр къызэIуахых, яхахъохэр нахьыбэ мэхъух. Мыщ фэдэ шIыкIэр Швейцарием щагъэфедэнымкIэ предложение къахьыгъагъ. ЫпшъэкIэ зигугъу къэтшIыгъэ Iофыгъор Урысыем щызэшIохыгъэным пае къэралыгъом къыщычIащырэ чIыдагъэм ибагъэ емылъытыгъэу, промышленностым хэхъоныгъэхэр ышIынхэм мэхьанэшхо иIэу экспертхэм алъытэ.

Гупчэ банкым къызэрэщыхагъэщырэмкIэ, 2018-рэ илъэсым иапэрэ квартал ВВП-м процент 0,6-рэ хэхъощт, ятIонэрэм процент 0,5-кIэ зыкъиIэтыщт. Мыщ дэжьым агъэнэфэгъэ къэгъэлъэгъонхэм зэхъокIыныгъэхэр афэхъунхэ ылъэкIыщт. Экономикэм нахь лъэшэу зыкъегъэIэтыгъэнымкIэ къэралыгъом ахъщэ фимыкъоу специалистыбэм алъытэ.

Къэзыгъэхьазырыгъэр КIАРЭ Фатим.