«Динамо-МГТУ» Мыекъуапэ — «Эльбрус» Щэрджэскъал — 97:71 (20:21, 24:18, 20:16, 33:16). Мэлылъфэгъум и 12-м республикэ спорт Унэшхоу «Ошъутенэм» щызэдешIагъэх.
Джэрз медальхэм якъыдэхын фэгъэхьыгъэ ятIонэрэ зэIукIэгъум Адыгэ Республикэм ибаскетбол командэ ешIэкIэ дэгъу къыщигъэлъэгъуагъ. ХьакIэхэр яIэпэIэсэныгъэкIэ «Динамо-МГТУ-м» нахь лъэшыхэп. Ар «Эльбрусым» зыдишIэжьызэ, гуетыныгъэ ин ешIакIо пэпчъ къызыхигъафэщтыгъ. Хъурджанэм пэчыжьэхэу хъагъэм Iэгуаор бэрэ радзэныр Щэрджэскъалэ къикIыгъэхэм къадэхущтыгъэп. Ухъумэн Iофыгъохэр тиешIакIохэм цыхьэшIэгъоу агъэцэкIагъэх.
— Я 32-рэ такъикъым нэс рэхьат тиIагъэп. Очкоуи 2 — 5-кIэ хьакIэхэм апэ титыгъ, — къытиIуагъ «Динамо— МГТУ-м» итренер шъхьаIэу Андрей Синельниковым. — Нахь шъуамбгъоу тешIэным тызэрэпылъым дакIоу псынкIэу тапэкIэ тилъыщтыгъ, ащ фэдэ къэгъэзапIэм хьакIэхэр фэмыхьазырхэу къэлъэгъуагъэх.
Апэрэ зэIукIэгъум Павел Россовыр дэгъоу щешIагъ, очко 21-рэ къытфихьыгъ, ятIонэрэ зэнэкъокъум Н. Ереминыр, И. Коротковыр, П. Россовыр, А. Напошиныр, И. Хмарэ къыщыхэтэгъэщых. ТекIоныгъэм икъыдэхын яIахьышIу хашIыхьагъ.
ТекIоныгъэр гъогогъуищэ къыдэзыхырэм джэрз медальхэр фагъэшъошэщтых. Мэлылъфэгъум и 18 — 19-м зичэзыу ешIэгъухэр Щэрджэс къалэ щыкIощтых. «Эльбрусым» ешIэгъуитIуми текIоныгъэр къащыдихмэ, я 5-рэ зэIукIэгъур ящыкIагъэ хъумэ, мэлылъфэгъум и 21-м Мыекъуапэ щыкIощт. ЕшIэгъур зыхьырэм джэрз медальхэр фагъэшъошэщтых.