Республикэ общественнэ движениеу «Адыгэ Хасэм» иIофыгъохэм ныбжьыкIэхэр чанэу ахэлажьэх. МэфэкI зэхахьэхэм, адыгэ шэн-хабзэхэм яхьылIэгъэ зэIукIэгъухэм щысэшIухэр къащагъэлъагъох.
Хьадпэшъо Маринэ Великобританием щеджагъ, журналистикэмрэ политикэмрэ афэгъэхьыгъэ шIэныгъэхэр зэригъэгъотыгъэх. Апшъэрэ еджапIэр къэзыухыгъэ пшъашъэм адыгабзэр, урысыбзэр, инджылызыбзэр дэгъоу ешIэх.
— Мырзэ Суандэ, КъумпIыл ТIахьирэ, нэмыкI ныбджэгъухэм саригъусэу зэIукIэгъухэр Адыгэ Хасэм щызэхэтэщэх, — къеIуатэ Хьадпэшъо Маринэ. — Адыгэ шъуашэм, адыгэ быракъым ямэфэкI мафэхэр лъэшэу тшIогъэшIэгъоных.
Адыгэ къашъохэм япчыхьэзэхахьэхэу Мыекъуапэ щыкIохэрэм КъумпIыл ТIахьирэ кIэщакIо афэхъугъ. Пщынаохэр, джэгуакIохэр къегъотых, зэлъэпкъэгъухэр зэхещэх, егъэуджых.
Мырзэ Суандэ ансамблэу «Майкопчанкэм» къыщышъощтыгъ. Адыгэ къэралыгъо университетым зэрэчIэхьагъэм фэшI изыгъэпсэфыгъо уахътэ нахь макIэ хъугъэ.
— Лъэпкъ искусствэр тэркIэ еджапIэу щыт, — къытиIуагъ Мырзэ Суандэ. — Адыгэ Хасэм иIофыгъохэм тахэлажьэзэ, СтIашъу Юрэ, Нэгъуцу Аслъан, фэшъхьафхэм яIэпэIэсэныгъэ зыщыдгъэгъозагъ. IофшIапIэу «Нанэм» Нэгъуцу Аслъан кIэлэегъаджэхэр, студентхэр, кIэлэцIыкIухэр регъэблагъэх, лъэпкъ Iэпэщысэхэр ашIых, адыгабзэр нахьышIоу зэрэдгъэфедэн фаем тегущыIэх.
Республикэ общественнэ движениеу «Адыгэ Хасэм» изичэзыу зэфэсэу Мыекъуапэ щыкIощтым изэхэщэн ныбжьыкIэхэм яIахьышIу хашIыхьащт. Мырзэ Суандэ, Дзэсэжъ Альмир, КъумпIыл ТIахьир, Хьадпэшъо Маринэ къызэрэтаIуагъэу, лъэпкъ шIэжьым зыкъегъэIэтыгъэным фэшI Адыгэ Хасэм Iофыгъуабэ къыщаIэты. НыбжьыкIэхэр зэхэщакIохэм гъусэ афэхъухэзэ, ягулъытэ зегъэушъомбгъугъэным яшъыпкъэу пылъых.
Сурэтым итхэр: Хьадпэшъо Марин, КъумпIыл ТIахьир, Мырзэ Суанд.