Адыгэ кIэлэегъэджэ колледжэу Андырхъое Хъусенэ ыцIэ зыхьырэм истудентхэм Къэралыгъо авто-инспекцием иIофышIэхэр джырэблагъэ аIукIагъэх. Тигъогухэм ныбжьыкIэхэр зэращызекIохэрэм, мыхэм ялажьэкIэ къэхъурэ гъогу хъугъэ-шIагъэхэм япчъагъэ зэрахахъорэм инспекторхэр ыгъэгумэкIхэу Iофтхьабзэр зэхащагъ.
Пэублэм къэзэрэугъоигъэхэм видеоролик къафагъэлъэгъуагъ. Ащ ишIуагъэкIэ скоростым мэхьанэу иIэр, лъэсрыкIор гъогум тыримыутыным фэшI водителыр зыдэплъэн фаер, нэмыкI чIыпIэ зэжъу ифагъэмэ, зэрэзекIощт шIыкIэхэр ныбжьыкIэхэм арагъэшIагъэх.
Шапхъэхэр аукъохэ зэрэмыхъущтыр, цIыфым ежь ищыIэныгъэкIи къэзыуцухьэхэрэмкIи пшъэдэкIыжь гъэнэфагъэ зэрихьырэр агу къыгъэкIыжьыгъ гъогурыкIоныр щынэгъончъэнымкIэ Къэралыгъо автоинспекцием иотделэу Мыекъуапэ щыIэм ипащэу, полицием иподполковникэу Виталий Загайкэ. Джащ фэдэу тигъогухэм атехъухьэрэ хъугъэ-шIагъэхэр ыкIи тазырэу апылъхэр зэдэгущыIэгъум щысэу къащафахьыгъэх. ЗэкIэри анахь къызэрыкIо зекIуакIэкIэ къежьэ: апчхэр зэрагъэушIуцIырэр, щынэгъончъагъэм ибгырыпх, макIэу скоростым ебгъэхъуныр, джэгум хэлэжьэхэрэ машинэхэм уакъыдэчъэныр.
Гъогу транспорт хъугъэ-шIагъэхэм япчъагъэ, ахэр къызыпкъырыкIыхэрэр гухэкI тхьамыкIагъохэм атырахыгъэ видеохэр, щысэхэр отделым ипащэ игуадзэ ныбжьыкIэхэм къафихьыгъэх.
Автомобиль е мототранспорт зиIэхэр бэу студентхэм ахэтых. ЗекIорэ хэбзэгъэуцугъэхэм афэгъэхьыгъэу ахэм упчIабэ къатыгъ. Iофтхьабзэм щызэхахыгъэ къэбархэр зэкIэ адрэ къэмыкIуагъэхэми къазэрафаIотэжьыщтыр ныбжьыкIэхэм къыхагъэщыгъ.
Гъогум хэукъоныгъэхэр къызэрэпфимыгъэгъухэрэр кIэухым пстэуми агу къагъэкIыжьыгъ.
Хэгъэгу кIоцI IофхэмкIэ Министерствэм гъогур щынэгъончъэнымкIэ иотдел.