ГъэшIэгъонэу алъэгъугъэр бэ

Мыекъопэ къэралыгъо технологическэ университетым кIэлэцIыкIу лагерэу «Страна профессий» зыфиIоу къызэIуихыгъэм иятIонэрэ гъэпсэфыгъо мэкъуогъум и 24-м зэфашIыжьыгъ. Мэкъуогъум и 20-м къыщегъэжьагъэу и 24-м нэс ащ Iоф ышIагъ. Апшъэрэ еджапIэм IэнэтIэ лъыкIотэнымкIэ ыкIи сэнэхьатхэр къызIэкIэгъэхьэгъэнымкIэ и Гупчэ Iофтхьабзэм кIэщакIо фэхъугъ.

glavnaja(542)

— Нэбгырэ 50-м ехъу загъэ­псэфынэу ыкIи яшIэныгъэхэм ахагъэхъонэу тилагерь къекIо­лIагъ. Ахэм яуахътэ шIуагъэ хэлъэу зэрэдгъэкIощтым ти­шъып­къэу тыдэлэжьагъ. Мафэ къэс темэ зэфэшъхьафхэмкIэ Iоф адэтшIагъ. КIэлэцIыкIухэм дэгъоу зызэрагъэпсэфыгъэм дакIоу ныбджэгъукIэхэм нэIуасэ афэхъугъэх, ыпэкIэ къашъхьэ­пэщт шIэныгъэхэр зэрагъэгъо­тыгъэх. Сабын ашIыным, шэкI­хэм сурэтхэр атырашIыхьаным мэфитфым къыкIоцI защагъэгъо­загъ. Мыекъуапэ дэт организацие, предприятие зэфэшъхьафхэм яIофшIэн зэрэзэхащэрэр алъэгъунэу амал ядгъэ­гъотыгъ. Ащ нэмыкIэу мастер-классхэр, экскурсиехэр ренэу тиIагъэх. Мафэ къэс чIыпIэ зэфэшъхьафхэм зэрэтщагъэхэм нэмыкIэу, джэгукIэ шIыкIэм тетэу лекциехэм такъыфеджагъ, къэшъонымкIэ ыкIи орэд къэ­IонымкIэ флешмобхэр, къэгъэ­лъэгъонхэр къядгъэшIыгъэх, —къыщаIуагъ Мыекъопэ къэралыгъо технологическэ университетым ипресс-къулыкъу.

3(735)

Лагерым иятIонэрэ гъэпсэфыгъо зыщызэфашIыжьыгъэ ма­фэм Iофтхьэбзэ гъэшIэгъонхэр зэхащагъэх. Вожатхэр, ны-тыхэр, кIэлэцIыкIухэм яныбджэ­гъу­хэр ащ къырагъэблэгъа­гъэх. Ахэм апае агъэхьазырыгъэ концертым ягуапэу еплъыгъэх.

Гъонэжьыкъо Сэтэнай.