ЩыIэныгъэм дэшIэтых

Я VIII-рэ Дунэе фес­тиваль-зэнэкъокъоу «Адыгеим ижъогъо­жъыехэр» Мыекъуапэ зэрэщыкIуагъэр зэфэтхьысыжьызэ, гу­пшысэу хэтхы­гъэм, еплъыкIэхэм гъэзет­еджэхэр ­ащыдгъэгъуазэхэ тшIоигъу.

DSC_0758

Адыгэ Республикэм культу­рэмкIэ иминистрэ игуадзэу, Дунэе фестиваль-зэнэкъокъум изэ­хэщэкIо куп итхьаматэу, фести­валым идееу хэлъым икIэщакIоу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт зэхахьэм изэфэхьысыжь къызэрэщыхигъэщыгъэу, Адыгэ Республикэм ия 25-рэ илъэс фэгъэ­хьыгъэ Дунэе фестивалым лъэпкъ­хэр зэфищагъэх, ясэнау­щыгъэ нэбгырабэмэ къыщызэIуа­хыгъ. Парламентым и Комитет ипащэу Ирина Ширинам «жъо­гъожъыехэм» шIухьафтынхэр аритыжьыгъ.

Хэлэжьагъэхэр

Абхъазыр, Вьетнам, Казахстан, Молдовэр, Румыниер, Украинэр, Урысыем ­ишъолъыри 10, Астрахань, Волгоград, Рос­тов, Москва, Орловскэ ­хэкухэр, Къырым, Къэбэртэе-Бэлъкъарыр, Краснодар краир, Адыгеир, нэ­мыкIхэри.

КIэлэцIыкIу ыкIи ныбжьыкIэ 300 фэдиз зэнэкъо­къугъ. Илъэс 19 хъугъэ фестивалыр зызэха­щэ­рэр, дунэе мэхьанэ зыратыгъэр илъэси 9-м ежьагъ.

Зэнэкъокъухэм якъыхэхыкI

ЩыIэныгъэм зэхъо­кIы­ныгъэу къызыдихьыхэрэр, кIэлэцIыкIу­хэм­­рэ ныб­жьыкIэхэмрэ яшIэ­ныгъэ зэрэхагъахъорэр къызыщагъэ­лъэгъон алъэ­кIыщт Iофтхьабзэм имэхьанэ зыкъиIэтыгъ.

Орэд къаIуагъ, къэ­шъуагъэх, художественнэ творчествэм пы­щагъэхэр усэхэм къяджагъэх, лъэпкъ ­музыкальнэ Iэмэ-псы­мэ­хэмкIэ орэдышъохэр агъэжъынчыгъэх, циркым якъулайныгъэ щауплъэкIугъ.

DSC_0848

Зэхэтхэу къырыкIуагъэх

Мыекъуапэ изыгъэпсэфыпIэ парк къыщырагъажьи Дунэе фестивалым хэлажьэхэрэр къалэм иурам шъхьаIэу Краснооктябрьскэм къырыкIуагъэх. В. И. Лени­ным ыцIэ зыхьырэ пчэгум къынэ­сыфэхэ къяплъырэ цIыфхэр Iэгу къафытеуагъэх, дахэу ныб­жьы­кIэхэр зэрэфэпагъэхэр бэмэ гуа­пэ ащыхъугъ. Къэлэ паркым иор­кестрэ апэ итэу Адыгеим икомпозиторхэм аусыгъэ орэдхэр, мэ­къэмэ зэфэшъхьафхэр къырагъэ­Iуагъэх. Урысыемрэ Адыгеимрэ ябыракъхэр щагъэбыбэтагъэх. Ансамблэу «Майкопчанкэр», пащэр Къулэ Амэрбый, ипчъагъэкIи къа­хэщыгъ, лъэпкъ тхыпхъэхэмкIэ яшъуашэхэр гъэ­кIэрэкIагъэхэу урамым къырыкIуагъэх. Адыгэ шъошэ зэ­кIужьхэр зыщыгъхэр, Ростов хэ­кум къикIыгъэхэр, фэ­шъхьафхэри лъэгъупхъагъэх.

Фестивалым хэлэжьэрэ хэгъэ­гухэм, шъолъырхэм ацIэхэр атетхагъэхэу пхъэмбгъужъыехэр зы­хьырэ пшъашъэхэм зэхахьэр къа­гъэкIэрэкIагъ. Нэрылъэгъу Iэпы­Iэгъухэм шIуагъэу къатырэр ащ къыщынэфагъ. Къалэм ипчэгу шъхьаIэ щыуджыгъэх, Дунэе феc­тивалым ыцIэ зытетхэгъэ уцышъо быракъыр шар гъэпщыгъэхэм апышIагъэу ошъогум ныбжьы­кIэ­хэм ратIупщыхьагъ.

DSC_0816

Щытхъум изехьакIохэр

ШIухьафтын шъхьаIэр Румыниемрэ Вьетнамрэ яорэдыIохэу Стартан Михаеларэ Нгуен Хоа­рэ афагъэшъошагъ. Илъэси 6 — 9 зыныбжьхэм якуп Хьасанэкъо Бэлэрэ Шэлбэе Дамиррэ ­апэрэ чIыпIэр къыщыдахыгъ, пащэр КIэдэкIой Азид. Илъэси 10 — 15-м итхэр: Артем Мокровыр, пащэр Полина Мокрова. ­Илъэс  16 — 22-рэ зыныбжьхэр: Инрбул Дойна — Молдовэр, Къасымэ Къасим — Кощхьэблэ районым щыщ.

Апэрэ лъэгапIэ зиIэ Дипломхэр зыфагъэшъошагъэхэм къахэтэ­гъэщых тиреспубликэ щапIугъэхэ Маргарита Заваленковар, Мые­къопэ район, Трэхъо Дианэрэ Мамый Батыррэ, пащэр Лъэцэр Римм, Хьапыщтэ Ринат, Каралина Гоевар, Кощхьэблэ районым щыщых.

DSC_0737

Усэхэм къяджагъэхэр

ХъокIон Зарэ, Тхьэхъо Фати­мэ, Къасымэ Марат, Нэпсэу Самирэ, ЛIышэ Ислъам тиреспуб­ли­кэ щыщых, лъэгэпIэ зэфэ­шъхьаф­хэр зиIэ Дипломхэр ара­тыжьы­гъэх.

КъэшъуакIохэр

Мыекъуапэ илъэпкъ кIэлэцIыкIу къэшъокIо ансамблэу «Абрекхэр» зыфиIорэм апэрэ чIыпIэр къыдихыгъ, художественнэ пащэр ТхьакIумэщэ Налбек. ­Гурыт ныбжь зиIэхэм ермэл ­ансамблэу «Наири» къахагъэщыгъ. Тэхъутэ­мыкъое районым иансамблэу «Кавказым» ятIонэрэ чIыпIэр къы­дихыгъ, пащэр Сихъу Мурат.

Апэрэ лъэгапIэ зиIэ Дипломыр «Нартым» фагъэшъошагъ, пащэр Тутарыщэ СултIан, Тэхъу­тэмыкъое район.

Адыгэкъалэ ипщынаохэр, пащэр Хьэкомэ Сим, Тэхъутэмы­къое районым икIэлэцIыкIу орэ­дыIо куп, нэмыкIхэм щытхъуцIэ­хэр къыдахыгъэх. Адыгэ Респуб­ликэм искусствэхэмкIэ икIэлэ­цIыкIу еджапIэу К. Лъэцэры­къом ыцIэ зыхьырэм ишыкIэпщынаоу Гъогъо Дамир къыдежъыугъэр ЛIы­бзыу Джанти, пащэр ГъукIэ Замудин. ТикIалэхэм апэрэ чIы­пIэр къыдахыгъ.

DSC_0820

Жюрим пэщэныгъэ дызезы­хьэгъэ Урсу Евгение ЮНЕСКО-м илIыкIу, дунэе культурэм щашIэ. ШъэуапцIэкъо Аминэт зэхэщэкIо купым ыцIэкIэ Е. Урсум «тхьауе­е­гъэпсэу» риIожьыгъ, рэзэныгъэ тхылъыр ритыжьыгъ.

Фестивалыр концерт хэхы­гъэкIэ Мыекъуапэ ипарк щаухыгъ. ЩытхъуцIэхэр зыфаусыгъэхэр ошъогум ит жъуагъохэм къадэ­жъыугъэх, ясэнаущыгъэ хагъэхъо­­нэу афэтэIо. Фестивалым еплъы­кIэу фытиIэхэм яхьылIэгъэ тхы­гъэхэр Адыгэ Республикэм имэ­фэкI ипэгъокIэу къыхэтыуты­щтых.

ЕмтIылъ Нурбый.

Сурэтхэр фестивалым къыщытетхыгъэх.